Tayland türmisidiki 3 neper Uyghur türmidin qachqan

Muxbirimiz irade
2022.07.14
Share on WhatsApp
Share on WhatsApp

Tayland saqchi da'iriliri 14- iyul peyshenbe küni, taylandtiki türmide on yilgha yéqin waqittin béri tutup turuluwatqan Uyghur tutqunlardin 3 nepirining qéchip ketkenlikini élan qilghan.

“Binar xewerliri” torining bildürüshiche, bu mezkur 3 neper Uyghur tutqun mushu heptining béshida bankokning jenubidin texminen 320 kilomitér yiraqliqtiki prachu'ap xirixan ölkisidiki tutup turush ornidin qéchip ketken bolup, hazir saqchilar ularni jiddiy türde izdimektiken.  

Köchmenler idarisining tekshürgüchisi rattapong “Binar xewerliri” ge mundaq dégen: “Biz ularni izdewatimiz, men neq meydandin doklat kütiwatimen. Yéqindin buyan dem élish künliri sewebidin ishlar bir az asta bolup qaldi.”

Uning éytishiche, qéchip ketkenlerdin eli 25 yash, abdulla 30 yash, yene bir abdulla isimlik biri 29 yash iken. Tayland saqchi da'iriliri ularning ötkür kesküchi eswab arqiliq tömür rishatkilarni késip qachqanliqini bildürgen.

Türmidin qachqan yoquriqi 3 neper Uyghur tutqun 2013-2014-yilliri arisida xitaydin qéchip chiqip, malaysiya arqiliq türkiye qatarliq bixeter döletlerge kétish arzusi bilen tayland chigrasidin qanunsiz kirgende qolgha élin'ghan iken. Nöwette taylandtiki herqaysi türme we tutup turush orunlirida 52 din 56 nepergiche Uyghurning tutup turuliwatqanliqi mölcherlenmekte.

Tayland emeldarlirining “Binar xewerliri” ge éytishiche, 2013-we 2014-yilliri arisida texminen 475 neper Uyghur musapir taylandqa qéchip kirgen iken.

Bu Uyghur musapirlirigha yardem bérip kéliwatqan tayland ammiwi teshkilatlar fondi jem'iyitining re'isi chalida tajaro'énsuk “Binar xewerliri” ge qilghan sözide, Uyghurlarning tutup turuluwatqanliqigha 10 yil bolay dep qalghanliqini, tayland hökümitining emdi xitayning bésimigha qarimay ularni qoyup bérip, ularning bixeter jaylargha yötkilishige ruxset qilishi kéreklikini bildürgen.

Dunya Uyghur qurultiyi qatarliq 52 teshkilat yéqinda Uyghur tutqunlarning tayland türmiliride tutup turuluwatqanliqigha sekkiz yil bolghanliq munasiwiti bilen kolléktip bayanat élan qilip, tayland da'irilirini qamaqtiki Uyghurlarni derhal qoyup bérishke chaqirghan idi.

Mezkur bayanatta “Sherqiy türkistanda irqiy qirghinchiliq dawam qiliwatqan mushu peytte, biz herqaysi hökümetlerni tayland hökümiti bilen hemkarliship, Uyghur musapirlarni üchinchi bir bixeter döletke orunlashturushqa chaqirimiz,” déyilgen.

7-Ayning 8-küni élan qilin'ghan mezkur bayanatta yene tayland da'irilirining bundin 7 yil burun ayallar we balilarnimu öz ichige alghan 100 ge yéqin Uyghurni xitaygha qayturup bergenliki tilgha élin'ghan we tayland hökümitidin qalghan Uyghurlarning xitaygha qayturulmasliqigha kapaletlik qilishni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.