Tayland sotchisi Uyghurlarning halal yémeklik telipini qobul qildi

Washin'gtondin muxbirimiz uyghar teyyarlidi
2024.02.22

“Bénar xewerliri” (Benar News) ning 2024-yili 2-ayning 21-künidiki xewirige asaslan'ghanda, tayland sotchisi düshenbe küni “Térror gumandari” dep qarilip uzun yillardin buyan tayland türmiside yétiwatqan ikki Uyghurning halal yémeklik telipini qobul qilghan.

 Xewerde éytilishiche, 2015-yili taylandta yüz bergen yériwan ibadetxanisidiki bomba partlitish weqesige chétilip eyiblen'gen adem qaradagh we yüsüp mir'eli yéqinda sotchidin özlirining diniy hoquqigha hörmet qilishni telep qilghan. Xewerde déyilishiche, ular bekla oruqlap ketken bolghachqa, chaqliq orunduqta olturup sotqa qatnashqan. Bu ikkiylen özlirining taylandtiki japaliq azab-oqubetlirini mundaq yekünligen: “Salametlikimiz körünerlik derijide nacharlashti, tamaqning yéterlik bolmasliqi sewebidin asta xaraktérlik qorsaq köpüshke giriptar bolup 10 kilogiramdin artuq oruqlap kettuq. Ashqazinimizmu dawamliq aghriydu”.

Ula yene mundaq dégen: “Üch yildin buyan, ular bizge halal yémeklik bérip baqmidi. Biz ulargha choshqa göshi yémeydighanliqimizni éyttuq. Shundaqtimu ular yenila choshqa göshi salmighan, dep bizge choshqa göshide etken tamaqlarni berdi. Biz tamaq yégende uningdin choshqa göshi we toxuning qénini bayqiduq. Biz bularni yémeymiz. Ularning biz üchün muwapiq tamaq orunlashturushini ümid qilimiz.”

Tayland sotchisi ikki Uyghur mehbusning telipini anglap chiqqandin kéyin ularning diniy hoquqi boyiche yémeklik bilen teminleshke kapaletlik qilishni buyrughan. Ular sottin buningdin burun köp qétim halal yémeklik telep qilghan bolsimu sotchi ret qilghan iken.

 Bu ikki Uyghurning soti deslepte herbiy sotta bashlan'ghan bolup, kéyin jenubiy bangkok jinayi ishlar sot mehkimisige yötkelgen. Bu délo xelq'ara közetküchilerning diqqitini qozghighanliqi ilgiri sürülmekte.

Kishilik hoquq teshkilatlirining bildürüshiche, tayland hökümiti texminen 180 dek Uyghur ayal we balini türkiyege yolgha sélish bilen bir waqitta, Uyghur musapirliridin er we ayal bolup texminen 120 dek kishini xitaygha ötküzüp bergen. Buningdin sirt 50 nechche Uyghur musapiri hazirgha qeder tayland köchmenler merkezliride tutup turulmaqta.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.