Tayland hökümitining xongkongluq pa'aliyetchini chégradin qayturuwétishi Uyghur musapirlarni eske saldi

Muxbirimiz irade
2016-10-06
Share

Xongkongdiki “Künlük inqilabi” dep nam bérilgen zor kölemlik oqughuchilar namayishning yétekchiliridin biri bolghan joshu'a wangning taylandqa kirgüzülmey xongkonggha qayturulush weqesi ötken yili taylandtin xitaygha qayturup bérilgen 100 neper Uyghur musapirning mesilisini qaytidin metbu'atlarning kün tertipige élip keldi.

Bügün, wal sitrit zhurnili, gardiyan géziti, ku'artiz zhurnili qatarliq gézit-zhurnallar hemmisi élan qilghan xewerliride “Tayland hökümitining xuddi xitayning buyruq beja keltürgüchisi” ge oxshap qalghanliqini bildürüshti.

Xewerlerde, tayland hökümitining ötken yili xitayning telipige bina'en taylandta panahlinip turuwatqan 100 neper Uyghur musapirni xitaygha qayturup bergenlikini, hazir bu Uyghurlarning aqiwitining éniqsiz ikenlikini bildürüshti. Ular shundaqla yuqiridiki bu weqeler xitay hökümitining jenubiy asiyadiki döletler üstidiki bésim we tesirining qanchilik derijide zoriyip ketkenlikini körsitip béridu, dédi.

Xelq'ara kechürüm teshkilatining asiya ishliri diréktori nikolas bikulin ku'artizgha qilghan sözide, 2008- we 2009-yilliri Uyghur éli we tibette yüz bergen weqelerdin kéyin xitaygha qoshna ellerge jénini élip qéchiwatqan Uyghurlar we tibetlerning köpeygenliki, shuning bilen teng, xitay hökümitiningmu bu döletlerge qaratqan bésimini zoraytqanliqini éytqan.

Joshu'a wang eslide teklipke bina'en taylandiki bir uniwérsitétqa nutuq sözlesh üchün yolgha chiqqan bolup, tayland chégra da'iriliri seweb körsetmey turupla uning tayland chégrasidin kirishige yol qoymighan idi. Weqedin kéyin tayland chégra saqchi bölümining mu'awin bashliqi prutipong wangning xitayning telipi bilen qara tizimlikke kirgüzülgenliki we shu sewebtin chégradin kirgüzülmigenlikini éytqan. Biraq u kéyin bu sözidin téniwalghan. Kéyin tayland hökümitimu buni ret qilip, özlirining buni xitaydin “Biwasite buyruq” élip qilmighanliqini, peqet yüz bergüsi siyasiy köngülsizliklerning aldini élish üchün qilghanliqini ilgiri sürgen idi.

Tayland da'irilirining bu herikiti xelq'aradiki kishilik hoquq organlirining küchlük tenqidige uchridi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet