Tayland saqchi terep bangkoktiki partlash weqeside qolgha élin'ghan gumandarning iqrar qilghanliqini bildürgen

Muxbirimiz qutlan
2015-09-07
Élxet
Pikir
Share
Print

Birleshme agéntliqning xewirige qarighanda, tayland saqchi da'iriliri bügün, yeni 7-séntebir bayanat bérip, bangkoktiki partlash weqesige chétishliq dep qolgha élin'ghan ikki gumandardin birining "Iqrar" qilghanliqini bildürgen.

Tayland döletlik saqchi idarisining bayanatchisi prawut tawornséri bu heqte muxbirlargha bayanat bérip mundaq dégen: "Gumandar yüsüp mir'eli ötken hepte kambodzha chégrasigha yéqin jayda qolgha chüshti. Biz uni jinayi jawabkarliq boyiche soraq qilghinimizda, u öz jinayitini iqrar qildi."

Tayland saqchi terep ötken hepte gumandar yüsup mir'elining xitay pasporti bilen qolgha élin'ghanliqini, uning pasportida tughulghan jayning "Shinjang" dep yézilghanliqini tilgha alghan idi. Halbuki, tayland saqchi terep bügün muxbirlargha bergen bayanatida "Iqrar qildi" dep élan qilghan gumandar yüsüp mir'elining dölet teweliki heqqide héchqandaq éghiz achmighan.

Melumki, 17-awghust bangkokta partlash yüz bérip 20 kishi ölgendin kéyin tayland saqchi terep mezkur weqening Uyghurlargha chétilish éhtimalliqini chetke qaqmaydighanliqini tilgha alghan idi.

Tayland saqchi terepning eyni chaghda héchqandaq delil-ispat bolmighan ehwalda mezkur weqeni Uyghurlargha baghlishi jama'etchilikte küchlük guman peyda qilghan idi. Bügünki künde tayland saqchi terepning gumandarning "Iqrari" heqqidiki intayin ziddiyetlik bayanliri téximu zor shübhe qozghimaqta.

Közetküchiler we musteqil siyasiy analizchilar mezkur délo heqqide tayland bilen xitayning mexpiy ish birliki élip bérish mumkinchilikini ilgiri sürmekte. Ular, egerde bangkoktiki partlashning jawabkarliqi Uyghurlargha artilsa tayland 109 neper Uyghur musapirni xitaygha qayturghanliqi sewebidin kélip chiqqan xelq'ara bésimdin qutulidu؛ xitay bolsa Uyghurlarni muweppeqiyetlik halda xelq'aragha "Térrorchi" qilip körsitish meqsitige yétidu, dégenlerni tekitlimekte.

Toluq bet