Tayland saqchiliri: bangkok bomba hujumi gumandari bombini bash gumandarigha yetküzüp bergenlikini iqrar qildi

Muxbirimiz jüme
2015-09-09
Élxet
Pikir
Share
Print

Tayland saqchi da'iriliri charshenbe kündiki bayanatida bangkok bomba hujumigha chétilip qolgha élin'ghan ikkinchi gumandarning bomba qachilan'ghan somkini bash gumandargha yetküzüp bergenlikini iqrar qilghanliqini éytti.

17-Iyul bangkoktiki érawan ibadetxanisida bomba partlash weqesi yüz bérip az dégende 20 adem ölgen, 120 din artuq adem yarilan'ghan idi. Weqedin kéyin da'iriler nong chok rayonidiki ikki bina öyge basturup kirgen we bir gumandarini bomba yashash esliheliri bilen qolgha chüshürgenlikini bildürgen.

Ikkinchi gumandar mir'eli yüsüp 1-séntebir kambodzha chégrasida qolgha élin'ghan bolup, saqchilar uning qolida "Tughulghan orni 'shinjang' dep yézilghan xitay pasporti barliqi" ni ilgiri sürgen idi.

9-Séntebir tayland saqchi bayanatchisi prawut tawornsirining éytishiche, saqchilar seyshenbe we charshenbe künliri mir'eli yüsüpni u bomba yasash üchün "Matériyal" sétiwalghan dukan we bombini bash gumandarigha yetküzüp bergen poyiz istansisi qatarliq jaylargha élip barghan.

Prawut yene mir'elining bomba qachilan'ghan somkini nok chok rayonidin bir üch chaqliq kira motsiklitigha olturup belgilen'gen orun'gha yetküzüp bergenlikini iqrar qilghanliqini bildürdi. Emma saqchilar bomba yasalghan matériyallarning türi we xaraktérini ashkarilimidi.

Da'irilerning ilgiri sürüshiche, gumandarlar "WhatsApp" dep atilidighan yanfon uchur yumtalidin paydilinip alaqe qilghan, bash pilanlighuchi hujumni teshkillep bolup hujumdin burun taylandtin ayrilghan. Nöwette uning kimliki we dölet teweliki sir tutulmaqta.

Ilgiriki xewerlerde nong chok rayonidin qolgha élin'ghan "Adem karadag" isimlik gumandarining qolida türk pasporti barliqi ilgiri sürülgen idi.

Toluq bet