Тайланд һөкүмити уйғур мусапирлирини қандақ бир тәрәп қилишни техи қарар қилмиған

Мухбиримиз әркин
2017-07-14
Share

Тайланд һөкүмитиниң бир юқири дәриҗилик әмәлдари америка ахбаратиға сөһбәт елан қилип, тайланд һөкүмитиниң қамақтики уйғур мусапирлирини қандақ бир тәрәп қилишқа техи қарар бәрмигәнликини билдүргән.

«Америка авази» радийосиниң җүмә күни хәвәр қилишичә, тайланд һәрбий һөкүмитиниң муавин баш министириниң мәслиһәтчиси панитан ватанаягон мәзкур ахбарат оргининиң баңкоктики мухбириға қилған сөзидә, уйғур мусапирлирини қандақ бир тәрәп қилиш һәққидики ахирқи қарар техи чиқирилмиғанлиқини билдүргән. Тайланд һөкүмити 2015‏-йили 7‏-айда балилар, аяллар вә бир қисим әркәкләр болуп йүздин артуқ уйғур мусапирни хитайға мәҗбурий қайтуруп бәргән. Униң бу һәрикити хәлқара кишилик һоқуқ тәшкилатлири, б д т мусапирлар идариси вә уйғур тәшкилатлириниң қаттиқ әйиблишигә учриған.

Арқидинла баңкоктики ибадәтхана әтрапида партлаш йүз берип, 20 дәк адәм өлгән. Тайланд һөкүмити икки уйғурни партлашқа четишлиқ, дәп қолға елип, рәсмий әйиблигән. Әмма бу уйғур, һазирға қәдәр өзлириниң партлашқа четишлиқ икәнликини рәт қилип кәлгән.

«Америка авази»ниң хәвиридә қәйт қилишичә, панитан, «һазирқи вәзийәттә биз, болупму дөләт хәвпсизлик комитети уйғурларни өз ичигә алған пәрқлиқ гуруппиларни өз дөлитигә яки 3‏- бир дөләткә өткүзүп беришни давамлиқ көздин кәчүрүватимиз» дегән. Хәлқара кишилик һоқуқ тәшкилатлири, һәрқандақ бир дөләт уйғур мусапирлирини хитайға өткүзүп бәрсә, уларниң һаяти хәвпкә дучар болидиғанлиқини, улар тән җазасиға учраш яки из ‏- дерәксиз йоқап кетиштәк еғир ақивәткә қалидиғанлиқини агаһландуруп кәлди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.