Уйғурлар дияридин қезиливатқан енергийә байлиқлири ғайәт зор санда ашмақта

Мухбиримиз әзиз
2018-01-02
Елхәт
Пикир
Share
Принт

Әң йеңи мәлуматларға асасланғанда, мутәхәссисләр «хитайниң енергийә амбири» дәп аташқа адәтләнгән уйғурлар дияридин қезиливатқан йәр асти байлиқиниң сани шиддәт билән ашмақта. Болупму нефит вә тәбиий газ буниңда изчил алдинқи орунда туруп келиватқанлиқи мәлум.

Шинхуа агентлиқиниң 1-январдики хәвиригә қариғанда, өткән бир йилда тарим нефитликидин 25 милйон тоннидин көпрәк нефит қезивелинған. Охшаш мәзгил ичидә уйғурлар дияридин қезивелинған тәбиий газ миқдари 25 милярд куб метирға йәткән. Буниң билән уйғурлар дияри хитайниң үчинчи чоң нефит вә тәбиий газ базисиға айланған.

Хәвәрләрдин мәлум болушичә, хитай «ғәрбниң нефитини шәрққә йөткәш» туруба линийәси арқилиқ тарим нефитликидин ички хитайға тошуйдиған нефит миқдарини йилдин-йилға ашурмақта.

«Хитай күндилик хәвәрлири» гезитиниң 2-январдики хәвиридә ейтилишичә өткән 13 йил мабәйнидә тарим нефитликидин хитайниң шәрқтики өлкилиригә 200 милярд куб метирдин артуқ тәбиий газ тошулған. Буниң билән хитайдики 120 нәччә шәһәрдә яшаватқан 400 милйондин хитай пуқраси вә үч миңдин артуқ чоң типтики завутлар буниңдин бәһримән болған. Буниңда «ғәрбниң газини шәрққә йөткәш» намида бәрпа қилинған, уйғурлар дияридин шаңхәйгичә созулған төт миң километир узунлуқтики газ вә нефит турубиси асаслиқ тошуш васитиси болған.

Хитай мутәхәссислири болса хитай шәһәрлириниң мушу йосунда «көмүр дәври» дин «тәбиий газ дәври» гә киргәнликини қәйт қилип келиватқанлиқи мәлум.

Һалбуки мутәхәссисләр «хитайниң енергийә базиси» дәп атиливатқан бу райондики, җүмлидин тарим ойманлиқи әтрапидики йәрлик хәлқ болған уйғурларниң та бүгүнгә қәдәр изчил һалда намратлиқта яшаватқанлиқини, уйғурлар дияридин қезиливатқан ғайәт зор миқдардики тәбиий байлиқниң йәрлик хәлққә һечқандақ иқтисадий мәнпәәт елип кәлмигәнликини тәкитләп кәлмәктә.

Пикирләр (0)
Share
Толуқ бәт