Jungghar oymanliqidin yene 415 milyon tonna néfit zapisi bayqalghan

Muxbirimiz irade
2019-01-03
Élxet
Pikir
Share
Print

Xitay xewerler torining 3-yanwar küni tarqatqan xewirige qarighanda, xitay néfit shirkiti 2018-yili ichide jungghar oymanliqidiki sawen we maxu rayonliridiki yer qatlimida omumiy néfit zapisi 415 milyon tonnigha yétidighan ghayet zor bir néfitlikni bayqighan.

Xewerde déyilishiche, bu hazirghiche jungghar oymanliqidin bayqalghan eng zor néfit zapisi bolup hésablinidiken.

Xitayning shinxu'a agéntliqi téxi aldinqi ayda tarqatqan bir xewiride tarim oymanliqidin 100 milyard kub métirliq tebi'iy gaz zapisining bayqalghanliqini xewer qilghan idi.

Melum bolushiche, gherbiy-shimal néfitliki tewesidin qéziliwatqan tebi'iy gazning yilliq qézilish miqdari toqquz yildin buyan izchil 1.4 Milyard kub métirdin artuq bolup kelmekte iken.

Alaqidar matériyallarda körsitilishiche, xitay hökümiti "Gherbni keng kölemde échish" sho'ari astida Uyghurlar diyarida tebi'iy gaz bayliqlirini qézish kölimini téz sür'ette kéngeytken. 2005-Yilidin buyan qézilghan tebi'iy gazning omumi miqdari 19 milyard kub métir iken. Bu gazning 14 milyard kub métiri sétilghan bolup, Uyghur diyari xitay ölkilirining asasliq tebi'iy gaz menbesi bolup kelmektiken.

Uyghur analizchilar bu heqte pikir bayan qilip, xitay hökümitining hedep Uyghur élidiki köp qisim nahiye we yézilarni "Namrat" dep teshwiq qilip kelgenlikini, emma Uyghur diyaridiki yer asti bayliqlirining hemmisini dégüdek xitay ölkilirige toshup kétiwatqanliqini tekitlidi.

Toluq bet