Bu yil Uyghur éli ichkiri ölkilerni yenimu köp éléktr bilen teminleydiken

Muxbirimiz irade
2017-01-05
Élxet
Pikir
Share
Print

Uyghur aptonom rayoni da'iriliri bu yil ichide ichkiri ölkilerni yenimu köp éléktr énérgiyisi bilen teminleydiken. "Xelq tori" da élan qilin'ghan xewerdin qarighanda, Uyghur éli "Shinjangning tokini sirtqa yetküzüsh" qurulushi boyiche 2017-yili ichkiri ölkilerge 45 milyard kilowat sa'et tok yetküzüsh nishanini ishqa ashuridiken. Buning üchün Uyghur élide yenimu köp tok ishlepchiqirish we yetküzüsh baziliri qurulidiken.

Xewerdin qarighanda, chong boghaz-qumul tok yetküzüsh-özgertish qurulushi yéqinda ishqa kirishken bilen teng, sherqiy jungghar-jenubiy enxuy tok yetküzüsh qurulushi bilen "Shinjangning tokini sirtqa yetküzüsh" qurulushining 3-liniyisi hésablinidighan qumulning shimali-xubéy jingmén alahide yuqiri bésimliq turaqliq tok yetküzüsh qurulushimu yolgha qoyulghan.

Uyghur élining tokini xitay ichkiri ölkilirige yetküzüsh qurulushi 2011-yili 12-ayda xitay döletlik tereqqiyat we islahat komitéti teripidin testiqlan'ghan muhim türlerning biri bolup, Uyghur diyarining éléktr énérgiyesini ichkiri ölkilerge yetküzüsh ishliri bashlinip, uning miqdari dawamliq ashurulmaqta iken.

Xewerlerdin melum bolushiche, xitay hökümiti yéqinqi yillardin buyan "Gherbning gazini sherqqe yetküzüsh" qurulushi boyiche déngiz boyidiki ölkilerni tebi'iy gaz bilen teminleshni dawamlashturuwatqan bolup, " Shinjangning tokini sirtqa yetküzüsh" qurulushimu oxshashla ichkiri ölkilerning éléktr énérgiye éhtiyajini hel qilishni meqset qilidiken.

Toluq bet