Tarimning tebi'iy gazlirini ichkiri xitaygha yetküzüsh kücheytilmekte

Muxbirimiz ümidwar
2017-01-18
Élxet
Pikir
Share
Print

Tarim néfitlikining hazirghiche gherbning gazini sherqqe yetküzüsh turuba liniyiside ichkiri xitaygha yötkigen tebi'iy gaz miqdarining jem'iy 180 milyard kupmétirdin ashqanliqi ashkarilandi.

"Xitay uchur tori"ning bu heqtiki xewiridin melum bolushiche, xitay döletlik néfit shirkitige tewe tarim néfitliki xitayning gherbning gazini sherqqe yötkeshtiki asasliq menbe bolup, xitayning sherqiy rayonliridiki tebi'iy gaz éhtiyajining éshishi netijiside, tarim néfitliki tarim oymanliqidin téximu köp tebi'iy gaz élishni kücheytken. Ichkiri ölkilerge toshulidighan tebi'iy gazning miqdari yildin-yilgha ashurulghan.

Ötken yili, tarim néfitliki 23 milyard 500 milyon kubmétir tebi'iy gaz ishlep chiqirip, uning 19 milyard kubmétirini sherqiy xitaygha yötkigen.

Yéqinqi waqitlarda tarim néfitliki yéngidin 30nechche tebi'iy gaz quduqidin tebi'iy gaz élishqa bashlap, mehsulat miqdarini ashurghan.

Shinxu'a torining buningdin bir qanche kün ilgiri ashkarilishiche, 2017-yili, 1-ay ichide, ottura hésab bilen bir künde tarimdin sirtqa toshulghan tebi'iy gaz miqdari 71 milyon kupmétirdin ashqan idi.

Tarim oymanliqining tebi'iy gazliri xitayning shangxeyni merkez qilghan 14 ölke we biwasite qarashliq shehiri hemde 80 din artuq chong-kichik sheherlerdiki 300 milyondin artuq ahalini teminlep kelmekte.

Emma yerlik Uyghurlarning éytishiche, tarim néfitlikining tarim oymanliqi etrapidiki ahalilerni teminleshke ajratqan tebi'iy gazlirining miqdari az bolmaqta. Uyghur diyarining jenubidiki köp sanliq namrat Uyghur ahalilirining tebi'iy gaz ishlitishke qurbi yetmeydiken shuningdek bir qisim yéza‏-qishlaq ahalisi téxiche tebi'iy gaz ishlitishtin bixewer yashimaqta iken.

Toluq bet