Уйғур районидин чиқидиған көмүр билән ишләпчиқирилған ток биткойин тәңгисини ясашқа ишлитилидикән

Бломберг ториниң йеқинда бәргән хәвиридә ейтилишичә, беткойин тәңгисини ясаш үчүн кетидиған әрзан баһалиқ ток, уйғур районидин чиқидиған әрзан баһалиқ көмүр билән мунасивәтлик икән.

Хәвәрдә мундақ дейилгән: “йеңидин ишләпчиқириливатқан биткойин тәңгиси хитайниң шинҗаң дегән җайидин чиқидиған әрзан баһалиқ көмүр билән ишләпчиқирилидиған ток билән мунасивәтлик болуши мумкин. Йеқинқи йиллардин бери, уйғур мусулманлири учраватқан зулум түпәйлидин‚шинҗаң‛ниң сесиқ нами пур кәтти. Һалбуки бу район биткойин ишләпчиқириш мәркизидур. Камбириҗ университети тәтқиқатчисиниң билдүрүшичә, 2020-йил 4-айға қәдәр дунядики биткойинларниң үчтин икки қисми хитайда ишләпчиқирилған, униңму йерими дегүдәк шинҗаңда ишләпчирилған”.

Хәвәрдә билдүрүлүшичә, бу биткойинларни ясаш үчүн һәрикәтлинидиған компютерлар әрзан баһалиқ токқа еһтияҗлиқ болуп, “хизмәт испати” дегәндәк мурәккәп тәңлимә билән мәшғулат елип баридикән һәмдә үчинчи тәрәп оттурида болмиған әһвалда содини бекитидикән, буниңға көмүр кан хоҗайинлириму чиқим қилидикән. Ғәрб әллиридә көмүр исини йоқитиш тәшәббус қилинидиған болуп, буниң әксичә, уйғур районида көмүр қалап һава булғаш арқилиқ ток чиқиридиған завутлар көп икән.

Биткойин 2008-йил кәшип қилинған рәқәмлик пул болуп, йеқинда тесла ширкитиниң башлиқи, даңлиқ карханичи елан маск (Elon Musk) ниң бу содиға қетилиши билән биткойн тәңгисиниң қиммити 50 миң долларға йеқинлап қалған.