Хитай һөкүмити уйғур елидики нефит вә тәбиий газ ишләпчиқиришини шиддәт билән ашурмақта

Мухбиримиз ирадә
2021-03-11
Share

Хитай һөкүмити уйғур елидики тәбиий байлиқларни талан-тараҗ қилишни җиддий күчәйтмәктә. Хитай хәвәрләр торида елан қилинған хәвәрдин қариғанда, уйғур елидики асаслиқ нефит базилириниң бири болған җуңғар ойманлиқидики җуғланма газ ишләпчиқириш миқдари 10 милярд куб метирдин ешип кәткән.

Қарамил тәбиий газлиқи җуңғар ойманлиқиниң шәрқигә җайлашқан болуп, у җуңғар ойманлиқида байқалған 100 милярд куб метирлиқ запиға игә тунҗи тәбиий газлиқ икән. “җуңгар мәрвайити” дәп аталған бу тәбиий газлиқ 2008-йилиниң ахирида ишләпчиқиришқа кириштүрүлгән икән.

Хитай даирилири 2020-йилдин башлап, уйғур елидики нефит базилирида нефит вә тәбиий газ ишләпчиқириш қурулмисини күчәйтип, 20 милйон тоннилиқ заманиви чоң нефит вә тәбиий газ мәйданини толуқ қурушниң омумий истратегийилик нишанини оттуриға қойған.

Бундин башқа хитайчә “тәңритағ” торида елан қилинған хәвәрдә көрситилишичә, бу йил 1-мартқичә, тарим нефитлики 1 милйон 166 миң тонна нефит вә 5 милярд 700 милйон куб метир тәбиий газ ишләпчиқарған болуп, нефит вә тәбиий газ ишләпчиқириш миқдари охшаш мәзгилдикидин 530 миң тонна ашқан вә тарихтики охшаш мәзгилдики әң юқири рекортни яратқан.

Бу хәвәрдиму даириләрниң бу йил киргәндин буян, тарим нефитликидә ишләпчиқиришниң уда вә тез ешишиға капаләтлик қилғанлиқи, алдинқи икки айдила 23 йеңи қудуқни ишқа кириштүрүп, нефит вә тәбиий газ елип, пиландин айрим-айрим һалда 15 миң 800 тонна вә 51 милйон куб метир ашурулғанлиқи билдүрүлгән.

Һазир тарим нефитлики күнигә оттура һесаб билән 16 миң 800 тонна нефит вә 92 милйон 660 миң куб метир тәбиий газ ишләпчиқиридикән.

Чәт әлләрдики көзәткүчиләр юқириқи икки хәвәрдин хитай һөкүмитиниң җан-җәһли билән уйғур елиниң тәбиий байлиқлирини талан-тараҗ қилишни күчәйтиватқанлиқини очуқ көрүвалғили болидиғанлиқини тәкитлиди. Улар бир милләтниң байлиқлирини талан-тараҗ қилиш вә йөткәшму ирқий қирғинчилиқниң муһим бир намайәндиси, дәп көрсәтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт