Xitay hökümiti Uyghur élidiki néfit we tebi'iy gaz ishlepchiqirishini shiddet bilen ashurmaqta

Muxbirimiz irade
2021.03.11

Xitay hökümiti Uyghur élidiki tebi'iy bayliqlarni talan-taraj qilishni jiddiy kücheytmekte. Xitay xewerler torida élan qilin'ghan xewerdin qarighanda, Uyghur élidiki asasliq néfit bazilirining biri bolghan jungghar oymanliqidiki jughlanma gaz ishlepchiqirish miqdari 10 milyard kub métirdin éship ketken.

Qaramil tebi'iy gazliqi jungghar oymanliqining sherqige jaylashqan bolup, u jungghar oymanliqida bayqalghan 100 milyard kub métirliq zapigha ige tunji tebi'iy gazliq iken. “Junggar merwayiti” dep atalghan bu tebi'iy gazliq 2008-yilining axirida ishlepchiqirishqa kirishtürülgen iken.

Xitay da'iriliri 2020-yildin bashlap, Uyghur élidiki néfit bazilirida néfit we tebi'iy gaz ishlepchiqirish qurulmisini kücheytip, 20 milyon tonniliq zamaniwi chong néfit we tebi'iy gaz meydanini toluq qurushning omumiy istratégiyilik nishanini otturigha qoyghan.

Bundin bashqa xitayche “Tengritagh” torida élan qilin'ghan xewerde körsitilishiche, bu yil 1-martqiche, tarim néfitliki 1 milyon 166 ming tonna néfit we 5 milyard 700 milyon kub métir tebi'iy gaz ishlepchiqarghan bolup, néfit we tebi'iy gaz ishlepchiqirish miqdari oxshash mezgildikidin 530 ming tonna ashqan we tarixtiki oxshash mezgildiki eng yuqiri rékortni yaratqan.

Bu xewerdimu da'irilerning bu yil kirgendin buyan, tarim néfitlikide ishlepchiqirishning uda we téz éshishigha kapaletlik qilghanliqi, aldinqi ikki aydila 23 yéngi quduqni ishqa kirishtürüp, néfit we tebi'iy gaz élip, pilandin ayrim-ayrim halda 15 ming 800 tonna we 51 milyon kub métir ashurulghanliqi bildürülgen.

Hazir tarim néfitliki künige ottura hésab bilen 16 ming 800 tonna néfit we 92 milyon 660 ming kub métir tebi'iy gaz ishlepchiqiridiken.

Chet ellerdiki közetküchiler yuqiriqi ikki xewerdin xitay hökümitining jan-jehli bilen Uyghur élining tebi'iy bayliqlirini talan-taraj qilishni kücheytiwatqanliqini ochuq körüwalghili bolidighanliqini tekitlidi. Ular bir milletning bayliqlirini talan-taraj qilish we yötkeshmu irqiy qirghinchiliqning muhim bir namayendisi, dep körsetti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.