Xitaylarning "Bayliq qézishi" jeryanida Uyghurlarning téximu namratlishiwatqanliqi diqqet qozghidi

Muxbirimiz eziz
2018-05-03
Élxet
Pikir
Share
Print

Alaqidar mutexessisler "Xitayning énérgiye ambiri" dep teswirlewatqan Uyghur diyarining bay nahiyeside yéqinda "Qiyir üsti ochuq kömür kan rayoni" resmiy ishqa kirishtürülgen.

"Xitay xewerliri tori" ning 3-maydiki xewirige qarighanda, bu kömürlük Uyghur diyaridiki eng chong üsti ochuq kömürlük hésablinidiken hemde yiligha bir milyon ikki yüz ming tonnidin artuq kömür ishlepchiqirish quwwitige ige iken.

Bu kömürlerning bazar nerxini bolsa besh yüz milyon som bilen alte yüz milyon somghiche ariliqta mölcherleshke bolidiken. Uyghur diyarida "Bayning kömüri" dep meshhur bolghan bay nahiyesidiki kömürler süpitining yuqiriliqi bilen alahide orun igileydiken.

Shuning bilen birge yéqinda xoten wilayetlik waliy mehkimisi uqturush chiqirip képek altun, qashtéshi qatarliq bayliqlarni dawamliq qézishqa bolmaydighanliqini belgiligen. Uqturushta bu qilmishlarni bayqighanlarning alaqidar orunlargha pash qilishi uqturulghan hemde "Bu xil bayliq qézish qilmishliri muhitni éghir derijide weyran qilmaqta," dep körsitilgen.

Melum bolushiche, xoten rayonidiki on nechche yillap dawam qilghan "Qashtéshi qézish qizghinliqi" xoten bostanliqidiki asasliq su menbeliri bolghan yurungqash we qaraqash deryalirining ékologiyelik muhitini éghir derijide weyran qilghan.

Xitayning alaqidar melumatlirida körsitilishiche, bay nahiyesi we xoten wilayiti Uyghur diyaridiki eng namrat rayonlardin hésablinidiken. Uyghur pa'aliyetchiler bu heqte pikir qilip, "Xitay hökümitining bayliq qézish herikiti Uyghur diyaridiki muhitni weyran qilipla qalmastin, bu jeryanda yerlik Uyghurlarni téximu namratlashturmaqta," dep körsetti.

Toluq bet