Uyghur diyaridiki tebi'iy gaz bayliqining 2018-yilliq mehsulat miqdari ghayet zor derijide ashqan

Muxbirimiz eziz
2018-12-18
Élxet
Pikir
Share
Print

Xitay hökümitining Uyghurlarni "Lagérlargha yighiwélish herikiti yuqiri pellige chiqiwatqanda Uyghurlar diyaridiki tebi'iy bayliqlarning qézilish sür'iti, kölimi we miqdarining zor derijide éship bériwatqanliqi kishilerning diqqitini qozghimaqta.

Xitay hökümiti bashqurushidiki shinxu'a agéntliqining 13-dékabirdiki xewiride éytilishiche, bu yil qish kirgendin buyan tarim oymanliqidin 100 milyard kub métirliq tebi'iy gaz zapisi bayqalghan. Tarim néfitlikidiki alaqidar xitay emeldarlar bu heqte söz qilip: "Bu yéngi tebi'iy gaz zapisining bayqilishi gherbning gazini sherqqe yötkesh qurulushi üchün bir yéngi gaz menbesi bolup qalghusi. Bu élimizning tebi'iy gaz bilen teminlesh ishlirini yenimu ilgirilep kapaletke ige qilidu" dégen. Hazirqi bazar nerxide her kub métir tebi'iy gazning bahasi 2-3 som ariliqida bolmaqta iken.

"Yünnen iqtisad tori" da 17-dékabir élan qilin'ghan xewerde éytilishiche, gherbiy shimal néfitliki tewesidin qéziliwatqan tebi'iy gazning yilliq qézilish miqdari toqquz yildin buyan izchil 1.4 Milyard kub métirning yuqirisida bolup kelmekte iken.

Alaqidar matériyallarda körsitilishiche, xitay hökümiti "Gherbni keng kölemde échish" sho'ari astida Uyghurlar diyarida tebi'iy gaz bayliqlirini qézish kölimini téz sür'ette kéngeytken 2005-yilidin buyan qézilghan tebi'iy gazning omumi miqdari 19 milyard kub métir iken. Bu gazning 14 milyard kub métir sétilghan bolup, xitay ölkilirining asasliq tebi'iy gaz menbesi bolup kelgen.

Uyghur analizchilar bu heqte pikir qilip: "Xitay da'iriliri del mushu pütmes-tügimes tebi'iy bayliqlargha Uyghurlar shériklik dawasi qilmisun, dep pütün küchi bilen Uyghurlarni basturush, Uyghurlarni assimilyatsiye qiliwétish qestide bolmaqta" dédi.

Toluq bet