Xitay hökümiti Uyghur élidiki tebi'iy gaz ishlepchiqirish miqdarini hedep östürmekte

Muxbirimiz irade
2019.10.24

Xitay xewerler torining 24-öktebir küni tarqatqan xewirige qarighanda, Uyghur élidiki jungghar néfitlikige qarashliq qaramil néfit we tebi'iy gaz rayonining yilliq ishlepchiqirish miqdarini ashurush xizmiti tamamlan'ghan.

Xewerdin melum bolushiche, jungghar oymanliqidiki qaramil tebi'iy gaz rayoni we uninggha qoshna bir qisim gaz qézish rayonlirida xitay da'iriliri tebi'iy gaz quduqlirigha urulidighan bésimni ashurush we chongqur yer astida gazini téz sür'ette sowutush arqiliq tebi'iy gaz qézish sür'itini biraqla nechche hesse ashurghan iken.

Buning bilen qaramil tebi'iy gaz rayonidiki gaz mehsulatlarning qézilish sür'iti we miqdari biraqla éship, yilliq suyuqlandurulghan gaz ishlepchiqirish miqdari 100 ming tonnigha yetküzülgen.

Halbuki, Uyghur diyaridiki néft, tebi'iy gaz qatarliq bu bayliqlarning yerlik xelq bolghan Uyghurlargha héchqandaq iqtisadiy menpe'et élip kelmeywatqanliqi melum.

Shinxu'a torining 21-öktebir küni tarqatqan bir xewirige qarighanda, tarim néfitliki hazirghiche ishlepchiqarghan tebi'iy gaz miqdari 240 milyard kub métirdin éship ketken. Bu gazlar turuba yolliri arqiliq 15 tek xitay ölkisining chong-kichik 120 din artuq shehirige toshulup, 400 milyon ahale we 3000 din artuq zawut-karxanini gaz bilen teminligen iken.

Melum bolushiche, gherbiy-shimal néfitliki tewesidin qéziliwatqan tebi'iy gazning yilliq qézilish miqdari toqquz yildin buyan izchil 1. 4 Milyard kub métirdin artuq bolup kelgen.

Uyghur analizchilar bu heqte pikir bayan qilip, xitay hökümitining hedep Uyghur élidiki köp qisim nahiye we yézilarni “Namrat” dep teshwiq qilip kelgenlikini, emma Uyghur diyaridiki yer asti bayliqlirining hemmisini dégüdek xitay ölkilirige toshup kétiwatqanliqini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.