Téksas ishtatining bashliqi xitayning chégra halqighan tutush herikitige qarshi buyruq élan qilghan

Téksas ishtatining bashliqi grég abbot (Greg Abbott) düshenbe küni, xitay hökümitining chet'elde yashaydighan xitaylarni qorqutush we ularni xitaygha qaytishqa mejburlash üchün qollan'ghan herikitige zerbe bérish üchün memuriy buyruq chiqarghan.

Téksas ishtati hökümitining xewirige qarighanda, xitay hökümiti amérikadiki öktichilerni xitaygha mejburiy qayturush üchün “Tülke owlash herikiti” élip barghan bolup, ishtat bashliqi grég abbot saqchi idarisige bu heriketni ijra qiliwatqanlargha zerbe bérip, ularni qolgha élish buyruqi bergen.

Xitay hökümiti chirik emeldarlarni öz ichige alghan qachqunlarni qoghlap tutushni “Tülke owlash herikiti” dep atap kéliwatqan bolup, buning on yilgha yéqin dawamlashqan heriket ikenliki bilinmekte. “Amérika birleshme agéntliqi” ning 2023-yili 6-aydiki xewirige qarighanda, amérika da'iriliri xitayning bu herikitini “Dölet halqighan basturush” yaki chet'elde yashaydighan öktichilerge parakendichilik sélish, tehdit sélish we jimiqturush üchün qollan'ghan tedbiri dep qaraydu.

Téksas ishtatining bashliqi grég abbot bayanat bérip mundaq dégen: “Men téksas saqchi idarisige téksasliqlarni parakende qilghan shexslerni tépish we ularni jinayi jawabkarliqqa tartishni buyrudum. Biz téksasni xitay kompartiyesining qanunsiz basturush heriketliridin qoghdash üchün tirishimiz”.