Xitay da'iriliri Uyghur élidiki teminlesh zenjirining muqimliqigha kapaletlik qilishni telep qildi

Xitay da'iriliri Uyghur élide yéngi tipliq tajsiman wirusi qayta partlap, nurghun jaylar qattiq teqib we karantin astigha élin'ghan bir waqitta, mezkur rayonning maddiy eshya oboroti we teminlesh zenjirige kapaletlik qilishni telep qilghan. “Shinjang géziti” ning xewer qilishiche, Uyghur aptonom rayonluq partkom 15-awghust küni ma shingrüyning bashchiliqida téléfon yighini chaqirip, Uyghur élide maddiy eshya oboroti we teminlesh zenjirige kapaletlik qilish toghrisida orunlashturush élip barghan. Yighinda aptonom rayonluq partkom sékrétari ma shingrüy, teminlesh zenjirige kapaletlik qilishta mes'uliyetning qattiq ching tutushni telep qilghan. 

U, rayonda yuqumning aldini élish tedbirlirini qattiq yolgha qoyup,  shi jinpingning yuqumni “Nölge chüshürüsh” toghrisidiki yol yoruqini estayidil ijra qilish bilen bir waqitta, “Maddiy eshya oboroti, teminlesh zenjirining muqimliqi, déhqanchiliq ishlepchiqirishini……eng zor derijide qoghdash we yuqumning iqtisadiy, ijtima'iy tereqqiyatqa bolghan tesirini eng töwen chekke chüshürüsh” ni telep qilghan. Kishilik hoquq teshkilatlirining qeyt qilishiche, ma shingrüyning bu siyasiti Uyghurlargha bolghan bésimni téximu kücheytip, ularni téximu keng kölemde mejburiy emgekke sélishqa türtke bolidiken. Xitay hökümiti 2020-yili yéngi tajsiman wirusi partlap zawutlar taqalghan, pütün xitay qamal qilin'ghan bir waqittimu Uyghurlarni xitay zawutlirida ishleshke mejburlighanidi. 

Yighinda ma shingruy yene “ Yuqumning aldini élish we uni kontrol qilish üchün barliq tirishchanliqlarni körsitish bilen bir waqitta, barliq jaylar we tarmaqlarning maddiy eshya oboroti we sana'et zenjiri we teminlesh zenjirining muqimliqigha kapaletlik qilish, herqaysi tereplerning mes'uliyitini ching tutush” ni tekitlep, yerlikning öz aldigha qatnashni toxtitishini, ruxsetsiz yuqumni tekshürüsh ponkitlirini qurushini, qatnashni qatmu-qat kontrol qilishni chekligen. Ayrodrom, tömüryol yük wogzallirining we mal oborot merkezlirining normal meshghulatigha kapaletlik qilishni telep qilghan.