Xitay da'iriliri ürümchide “Tengritagh-2014” namliq manéwir ötküzdi

Muxbirimiz méhriban
2014-06-10
Share

Da'iriler 9-iyun düshenbe küni ürümchide, térrorluqqa zerbe bérish iqtidarini ashurush meqsitide “Tengritagh ‏- 2014‏” namliq manéwir ötküzgen. Xitayning “Shinjang géziti” qatarliq hökümet metbu'atlirida déyilishiche, bu manéwir tuyuqsiz yüz bérish éhtimali bolghan “Térrorluq hujumlirigha zerbe bérish”ni meqset qilghan bolup, manéwir ötküzülgen küni ürümchide yene yéqinda qurulghan Uyghur aptonom rayonluq térrorluqqa zerbe bérish xizmet guruppisining 2014-yilliq 1-qétimliq yighini échilghan.

Melum bolushiche, düshenbe küni ürümchide ötküzülgen manéwirgha qoralliq qisim saqchi, eskerliri, alahide saqchilar, eskerler, xelq eskerliri, ot öchürüsh etriti, doxturlar, organlarda ishleydighan xizmetchiler qatarliq köp sahedin adem qatnashqan bolup, da'iriler bu qétimqi manéwir heqqide bergen xewiride “Térrorluqqa zerbe bérish” herikitini omum xelq herikitige aylanduridighanliqini alahide eskertken.

Xitay weziyitini közetküchilerning qarishiche, xitay hökümitining Uyghurlargha qaratqan her xil basturushni kücheytishi seweblik yéqinqi birqanche yildin buyan xitayda Uyghurlarning naraziliqi we qarshiliq hujumliri köpeygen. Bu yil 1-mart künmingda yüz bergen “Künming poyiz istansisida pichaqliq hujum weqesi”, 30-aprél ürümchide yüz bergen “Ürümchi poyiz istansisidiki partlitish hujumi”, 22-may ürümchi etigenlik bazirigha aptomobilliq partlitip hujum qilish weqesi” qatarliqlardin kéyin, xitay weziyiti jiddiyliship, xitayda hökümet térrorluqqa zerbe bérishni tekitleydighan, xitay puqralirida “Térrorluq hujumigha uchrash wehimisi” kücheygen weziyet shekillen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet