Хитайдики чәтәл ширкәтлири тәңсиз муамилигә учраватқанлиқини билдүрди

Мухбиримиз ирадә
2013.09.05

Хитайдики явропа иттипақи содигәрләр уюшмиси хитай һөкүмитиниң чәтәл карханилириға адил муамилә қилмайватқанлиқини билдүрди.

Мәзкур орган пәйшәнбә күни бәргән баянатида, хитайдики чирикликкә қарши күрәш вә мал баһа тәкшүрүшидә асаслиқ чәтәл карханилириниң зәрбә бериш нишани қилиниватқанлиқини билдүрди.

Бирләшмә агентлиқиниң хәвәр қилишичә, йеқинда хитай даирилири бир қисим чәтәл сүт мәһсулатлири ширкәтлирини қалаймиқан баһа қойғанлиқини илгири сүрүп җәриманә қойған вә санофи, гләксосмисклайнға охшаш дора ширкәтлириниң хадимлири үстидин чириклик қилиш делоси турғузуп тәкшүрүш башлиған.

Уюшма башлиқи давид кусину юқиридики делоларда чәтәл карханилири билән хитай карханилириға тәңсиз муамилә қилиниватқанлиқини ейтқан вә шундақла хитайниң һөкүмәт контроллуқидики ахбарат васитилириниң чәтәл карханилири үстидин сунулған әрзләрни алаһидә көптүрүп тәшвиқ қиливатқанлиқидин шикайәт қилған.

У мухбирларға қилған сөзидә “биз бу мәсилиләр тоғрилиқ хитай һөкүмитиниң алақидар хадимлири билән көрүшүп, һәрқандақ бир һәрикәтниң чоқум қануний йоллар бойичә елип берилиши керәкликини әскәрттуқ” дегән. явропа иттипақи содигәрләр уюшмисиниң теббий дора содисиға мәсул хадими бруно генсбергер болса чәтәл дора ширкәтлириниң әмәлийәттә өлчәмлик мәшғулат системисиға әң әмәл қилидиғанлиқини, лекин әң көп тәкшүрүлидиғанларниңму йәнә шулар икәнликини билдүрүп “мән һечбир хитай дора ширкитиниң тәкшүрүлгәнликини аңлап бақмидим. Мән буни адил дәп қаримаймән” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.