Kishilik hoquqni közitish teshkilati: "Térmo fishérning 'shinjang' gha bi'o-téxnika sétishni toxtitishi yéterlik emes"

Muxbirimiz erkin
2019-02-27
Élxet
Pikir
Share
Print

Kishilik hoquqni közitish teshkilati amérikidiki térmo fishér shirkitining Uyghur rayonigha bi'o-téxnika eswablirini sétishni toxtitishining zörür, emma yéterlik emeslikini bildürgen.

Kishilik hoquqni közitish teshkilati xitay bölümining diréktori sofiye richardson mezkur teshkilatning torida maqale élan qilip, térmo fishér shirkitining qararida nurghun halqiliq so'allargha jawab bérilmigenlikini tekitligen.

Uning ilgiri sürüshiche, térmo-fishér shirkiti Uyghur rayonigha téxnika sétishni toxtatqan bolsimu, lékin buningda téxnikisi xata ishlargha ilitilgen bashqa shirketlerning ehwali, térmo fishérning bu sodining qayta yüz bermeslikining qandaq aldini alidighanliqi shuningdek bashqa ölkilerdiki xitay saqchilirigha téxnika sétishning qandaq bolidighanliqi qatarliq mesililer yenila mejhul iken.

Yéqinda "Nyu-york waqti géziti" xitay hökümitining Uyghur rayonida mejburiy "Omumiy xelq salametlik tekshürüshi" élip bérish arqiliq 34 milyon kishining DNA ewrishkisini yighip, ghayet zor DNA sandini qurup chiqqanliqi, buningda térmo fishér shirkitining Uyghur aptonom rayonluq j x nazaritige sétip bergen DNA retlesh eswabining halqiliq rol oynighanliqini ashkarilighan.

Térmo fishér shirkiti shu seweblik Uyghur aptonom rayonigha bi'o-téxnikisi sétishni toxtatqanliqini élan qilghan. Mezkur shirket "Nyu-york waqti géziti" ge bergen bayanatida "Biz xéridarlirimizning mehsulatimizni qandaq ishlargha ishletkenliki yaki ishlitilidighanliqigha köngül bölüshni muhim orun'gha qoyimiz" dégen idi.

Sofiye richardsonning ilgiri sürüshiche, "Xitayda soda qilidighan shirketler da'irilerning bu téxnikini qollinip, éghir depsendichilik sadir qilmaydu dégen xam xiyalda bolmasliqi kérek" iken.

U xitaydiki xelq'ara shirketlerning kim bilen soda qiliwatqanliqini, mehsulat we mulazimitining qandaq ishlargha ishlitiliwatqanliqini derhal közdin kechürüshi, kishilik hoquqqa xilap herqandaq bir alamet bayqalsa, bu sodini derhal toxtitishi kéreklikini bildürgen.

Toluq bet