Чира наһийәлик даириләр аммини "террорлуқ-зораванлиқ" қа даир йип учи тәмин етишкә сәпәрвәр қилған

Мухбиримиз қутлан
2017-02-20
Share

Игилишимизчә, чира наһийәлик хәлқ һөкүмити йеқинда 30 маддилиқ омумий уқтуруш чиқирип, наһийә тәвәсидики аммини "террорлуқ-зораванлиқ" қа даир йип учлири билән тәмин етишкә сәпәрвәр қилған.

Мәзкур уқтуруш чира наһийәлик хәлқ һөкүмитиниң тори билән хотән вилайәтлик партком тәшвиқат бөлүминиң торида елан қилинған болуп, униңда һәрқандақ бир гуманлиқ шәхс яки гуманлиқ вәқәләр һәққидә алдин йип учи тәқдим қилғанларға 1000 сомдин 500 миң сомғичә мукапат берилидиғанлиқи уқтурулған.

30 Маддилиқ бу уқтурушта җәмий 9 нуқта бойичә гуманлиқ әһваллардин йип учи билән тәминләш даириси көрситилгән. Улар "зораванлиқ-террорлуқ" қа даир учур-ахбаратлар, тордики "террорлуқ вә диний әсәбийлик" кә даир үн-син материяллири, "террорлуқ" қа ярдәм қилғанларниң йип учи, "сирттин қайтип кәлгән" кишиләрдики ғәйрий әһваллар, диний саһәдики гуманлиқ һаләтләр, партлиғучи буюмлар вә қутратқулуқ һәрикәтлири, ақма нопус вә иҗарә өйләргә даир учурлар, зәрбә берилгән яки бир тәрәп қилинғанларниң уруқ-туғқанлиридики ғәйрий әһваллар һәмдә башқа һәрқандақ шәкилдики гуманлиқ әһвалларни өз ичигә алидикән.

Мәзкур уқтурушта йәнә "ғазат", "һиҗрәт" қатарлиқ сәзгүр аталғуларни ишләткәнләр; "айюлтуз" бәлгисини тақиғанлар; дурбун, компас, хәритә, арқан, тиғлиқ әсваб, төмүр туруба, сәрәңгә қатарлиқ буюмларни сетивалғанлар; һөкүмәт кадирлири билән "вәтәнпәрвәр диний затлар" ни "капир", "мунапиқ", "хаин" дәп тиллиғанлар яки улар өткүзгән той, нәзирләргә бармиғанлар яки улар билән қол елишип көрүшүштин қачқанлар һәққидиму йип учи тәқдим қилиш тәләп қилинған.

Көзәткүчиләр, мәзкур уқтуруш хитай даирилириниң райондики барлиқ аһалиләрни һөкүмәт үчүн "көз-қулақ" болушқа һәмдә асасий қатламда амма арисиға йейилған җасуслуқ тори шәкилләндүрүшкә тиришиватқанлиқиниң бир һөҗҗәтлик пакити, дәп һесаблимақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт