Chira nahiyelik da'iriler ammini "Térrorluq-zorawanliq" qa da'ir yip uchi temin étishke seperwer qilghan

Muxbirimiz qutlan
2017-02-20
Share

Igilishimizche, chira nahiyelik xelq hökümiti yéqinda 30 maddiliq omumiy uqturush chiqirip, nahiye tewesidiki ammini "Térrorluq-zorawanliq" qa da'ir yip uchliri bilen temin étishke seperwer qilghan.

Mezkur uqturush chira nahiyelik xelq hökümitining tori bilen xoten wilayetlik partkom teshwiqat bölümining torida élan qilin'ghan bolup, uningda herqandaq bir gumanliq shexs yaki gumanliq weqeler heqqide aldin yip uchi teqdim qilghanlargha 1000 somdin 500 ming somghiche mukapat bérilidighanliqi uqturulghan.

30 Maddiliq bu uqturushta jem'iy 9 nuqta boyiche gumanliq ehwallardin yip uchi bilen teminlesh da'irisi körsitilgen. Ular "Zorawanliq-térrorluq" qa da'ir uchur-axbaratlar, tordiki "Térrorluq we diniy esebiylik" ke da'ir ün-sin matériyalliri, "Térrorluq" qa yardem qilghanlarning yip uchi, "Sirttin qaytip kelgen" kishilerdiki gheyriy ehwallar, diniy sahediki gumanliq haletler, partlighuchi buyumlar we qutratquluq heriketliri, aqma nopus we ijare öylerge da'ir uchurlar, zerbe bérilgen yaki bir terep qilin'ghanlarning uruq-tughqanliridiki gheyriy ehwallar hemde bashqa herqandaq shekildiki gumanliq ehwallarni öz ichige alidiken.

Mezkur uqturushta yene "Ghazat", "Hijret" qatarliq sezgür atalghularni ishletkenler؛ "Ayyultuz" belgisini taqighanlar؛ durbun, kompas, xerite, arqan, tighliq eswab, tömür turuba, serengge qatarliq buyumlarni sétiwalghanlar؛ hökümet kadirliri bilen "Wetenperwer diniy zatlar" ni "Kapir", "Munapiq", "Xa'in" dep tillighanlar yaki ular ötküzgen toy, nezirlerge barmighanlar yaki ular bilen qol éliship körüshüshtin qachqanlar heqqidimu yip uchi teqdim qilish telep qilin'ghan.

Közetküchiler, mezkur uqturush xitay da'irilirining rayondiki barliq ahalilerni hökümet üchün "Köz-qulaq" bolushqa hemde asasiy qatlamda amma arisigha yéyilghan jasusluq tori shekillendürüshke tirishiwatqanliqining bir höjjetlik pakiti, dep hésablimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet