Xitay hökümiti ötken yildin buyan Uyghur élida 181 “Térrorluq guruhi” ni tarmar qilghanliqini élan qilghan

Muxbirimiz qutlan
2015.05.25

25-May, yeni düshenbe küni xitay hökümet taratquliri xewer bérip, Uyghur aptonom rayon da'irilirining ötken bir yilda atalmish “Térrorluq guruhi” din 181 ni tarmar qilghanliqini ilgiri sürgen.

Xewerde yene atalmish “‛térrorluq guruh‚ lirining 96% i böshükidila ujuqturuldi” déyilgen.

Xitay kompartiyesining organ géziti bolghan “Xelq géziti” ning xelq'ara béti bu heqte Uyghur aptonom rayonluq partkomning sékrétari jang chünshyenning sözini neqil keltürüp, bu sanning ötken yili 5-aydin buyanqi “Qattiq zerbe bérish” herikitining netijisi ikenlikini tekitligen.

Melumki, ötken yili 22-mayda ürümchining saybagh rayonida etigenlik bazargha hujum qilish weqesi yüz bérip, Uyghur élining weziyiti jiddiyleshken. Da'iriler shu küni kéche sa'et 1:00 din bashlap bir yilgha sozulidighan “Qattiq zerbe bérish” herikitini bashlighan idi.

Xitay aliy sotining bu yil xitay memliketlik xelq qurultiyigha bergen doklatidin melum bolushiche, xitayda ötken yili 712 neper kishining atalmish “Térrorluq” we “Döletni parchilash” jinayiti bilen jazalan'ghanliqi melum.

Közetküchiler we musteqil siyasiy analizchilar yuqiriqi sanning köp qismini Uyghurlarning teshkil qilidighanliqini, xitay teshwiqatlirida “Uyghur” namining emeliyette “Térrorchi” dégen söz bilen süpetliniwatqanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.