Xitay qoralliq saqchi qisimliri Uyghur élide térrorluqqa qarshi manéwir ötküzgen

Muxbirimiz irade
2017-09-12
Élxet
Pikir
Share
Print

Xitayning shinxu'a agéntliqi bügün xewer bérip, xitay qoralliq saqchi qisimlirining Uyghur élida térrorluqqa qarshi manéwiri ötküzgenlikini bildürdi.

Xewerde déyilishiche, üch yérim kün dawam qilip bügün ayaghlashqan bu manéwir ürümchi, qeshqer, aqsu we ghuljida birla waqitta élip bérilghan iken. Uninggha 10 mingdin artuq qoralliq saqchining qatnashqanliqi melum.

Xewerde, mezkur herbiy manéwir arqiliq xitay qoralliq saqchi qisimlirining qumluq we taghliq rayonlirining murekkep jughrapiyelik shara'itida we kéchide heriket qilish iqtidarini ashurghanliqi bayan qilin'ghan.

Xitay qoralliq saqchi qisimlirining bu qétimliq manéwiri del chet'ellerdiki kishilik hoquq organliri xitay hökümitining Uyghur élida yürgüzüwatqan siyasetlirige qarita naraziliqi kücheygen bir mezgilde élip bérildi. Uyghur élining weziyitini közitip kéliwatqan bezi mutexessisler, xitay hökümitining rayonni "Saqchi dölitige xas sistéma" bilen idare qiliwatqanliqini ilgiri sürdi.

Xitayning "Xelq géziti" bügün xewer tarqitip, 9-ayning 18-küni etigen sa'et 10:00 da, Uyghur élida hawa mudapi'esi signalining sinaq teriqiside yangritilidighanliqini jakarlidi.

Igilinishiche, bu qétimqi hawa mudapi'esi signalini yangritish ishi ürümchi, qaramay, shixenze qatarliq 17 nuqtiliq sheherde ötküzülidiken.

Chet'ellerdiki Uyghur közetküchiler, xitay hökümitining bu heriketliri bir tereptin qolida tömürning suniqi bolmighan Uyghur xelqining yürikini siqishni meqset qilsa, yene bir tereptin özining herbiy teyyarliqlirini xelq'aragha aqlap körsitishni niyet qilghan, dep qarimaqta.

Toluq bet