Féysbuk qatarliq ijtima'iy taratqular xitayning Uyghurlar heqqidiki tetür teshwiqatlirigha sehne hazirlap bermektiken

Muxbirimiz sada
2019-08-21
Élxet
Pikir
Share
Print

Yéqinda amérikadiki dangliq ijtima'iy taratqu supisi bolghan féysbukta Uyghur diyaridiki tutup turush lagérlirining intayin yaxshi jay ikenliki teshwiq qilin'ghan élandin üchi tarqalghan.

BuzzFeed Xewerliri torining 20-awghusttiki xewiride déyilishiche, bu üch élanning ikkisi heriketchan, biri turghun halettiki élanlar iken. Uningda Uyghur diyaridiki tutup turush merkezlirining Uyghurlarning diniy étiqadi we erkinlikige dexli qilmaydighan bir jay ikenliki shu yerge qamalghan tutqunlarning "Tesirlik hékayiliri" arqiliq ispatlan'ghanliqi ilgiri sürülgen. Bu ikki heriketchan halettiki élan féysbukqa qoyulghili töt kün bolghan bolup, asasliqi amérika we bashqa döletlerdiki körürmenlerni merkez qilghan iken.

Mezkur xewerdin melum bolushiche, "Yershari waqti géziti" 19-awghust küni heriketchan halettiki xewerdin birni féysbukning élan bétige qoyghan hemde "Eger tutup turush merkezliri baldurraq wujudqa kelgen bolsa, térrorluq hujumliri téximu azlighan bolatti," dégen.

Amérika hökümiti Uyghurlarning ehwaligha yéqindin köngül bölüwatqanliqi ilgiri sürülüwatqan bir peytte féysbukcha oxshash dunyagha dangliq ijtima'iy taratquda xitayning tetür teshwiqatini élip baridighan élanlarning qoyulushi chet'eldiki kishilik hoquq pa'aliyetchilirining diqqitini qozghidi.

Muhajirettiki Uyghur közetküchilerning bildürüshiche, xitay hökümiti féysbukning dunya miqyasidiki qollinilish da'irisini yaxshi bilgechke, özining siyasiy teshwiqatlirini bu xil dunyawi ijtima'iy taratqulargha tarqitip, Uyghur diyarida yürgüzüwatqan insaniyliqqa qarshi jinayetlirini bézep körsitishke urunmaqtiken.

Toluq bet