Тәйвән йүз бәргүси ишғалға қарши туруш иқтидарини ашуруш үчүн һәрбий маневир өткүзмәкчи


2018-04-25
Share

Тәйвән дөләт мудапиә министирлиқи келәр һәптә кәң көләмлик һәрбий маневир өткүзидиғанлиқини җакарлиған.

Ройтерс агентлиқиниң хәвәр қилишичә, бу қетимлиқ маневирда тәйвән арилиға қарита йүз бәргүси ишғалға тақабил туруш асасий тема қилинидикән.

Гәрчә тәйвән дөләт мудапиә министирлиқиниң баянатида хитай биваситә тилға елинмиған болсиму, әмма униңда «һуҗум қозғиғучи күчләрниң тәйвәнни ишғал қилиши» дегән ибарә ишлитилгән. Бу қетимлиқ маневирда тәйвәнгә қарита ишғалийәтчи күчләрниң бесип киргән һалитигә қарита қайтурма һуҗум елип беришқа тәқлид қилинған уруш көрүнүши көрситилидикән. Бу арқилиқ тәйвән армийәсиниң шундақла мунасивәтлик уруш техникилири вә қурал-үскиниләрниң тақабил туруш иқтидари синақ қилинидикән.

Хитай билән тәйвәнниң мунасивити йеқинқи бир йилдин буян қаттиқ йирикләшкән. Тәйвән президенти сәй йиңвен гәрчә тәйвән мустәқиллиқини елан қилиш нийити йоқлуқини көп қетим оттуриға қойған болсиму, әмма хитай тәйвәнгә тәһдит селишни давамлаштуруп кәлгән. Хитай тәрәп тәйвән арилиға йеқин аралларға көп қетим бомба етиш, һәрбий айропиланлирини учуруштәк тәһдит характерлик һәрикәтләрни көз-көз қилип кәлгән.

Ройтерс агентлиқиниң хәвиридә, тәйвәнниң бу қетимлиқ маневирни хитай-тәйвән мунасивәтлиридики җиддийчилик билән мунасивәтлик, дәп көрсәткән. Хитай һөкүмити йеқинда америкиниң тәйвән әмәлдарлири билән болған рәсмий учришишларни күчкә игә қилидиған «тәйвән саяһәт қануни» ни мақуллишини қаттиқ тәнқид қилип, америкини «бир хитай сиясити» гә әмәл қилмиди, дәп әйиблигән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт