Сабиқ тәйвән әмәлдари: уйғурларға өзини өзи идарә қилиш һоқуқи берилиши керәк

Мухбиримиз җүмә
2014-10-11
Елхәт
Пикир
Share
Принт


Сабиқ тәйвән һөкүмәт хадими хитай һөкүмитиниң уйғурларға өзини өзи идарә қилиш һоқуқи бериши лазимлиқини билдүргән.

Тәйвәнгә җайлашқан «җуңго вақит гезити» ниң хәвәр қилишичә, бу сөзләрни тәйвәнниң моңғулийә вә тибәт ишлири комитетиниң сабиқ катипи лию шөяв 9 - өктәбир тәйбей шәһиридә өткүзүлгән өзиниң йеңи китабини тарқитиш мурасимда оттуриға қойған.

Лию илгири тәйвәндики министир дәриҗилик моңғул вә тибәт ишлар комитетида 40 йил хизмәт қилған болуп, униң йеқинда «шинҗаңдики террорлуқ һуҗумлириниң арқа көрүнүши» намлиқ китаби нәшрдин чиққан.

У мухбирларға қилған сөзидә хитай өз территорийиси ичидики һуҗумларни кемәйтиш үчүн уйғурларға қаритилған сиясәтлирини тәңшиши лазимлиқини билдүргән.

У мундақ дегән: хитайниң барлиқ мәсулийәтни аталмиш «үч хил күчләр» гә артип қоюши хата. Хитай һөкүмити шинҗаңға асасий муәссәсә вә байлиқ елип киргән болсиму, буниңдин пәқәт хәнзуларла мәнпәәт еливатиду.

У йәнә, уйғур елидә тинчлиқ бәрпа қилиш үчүн хитай һөкүмити уйғурларниң мәдәний вә диний туйғулирини һөрмәт қилиши керәкликини билдүргән.

Хитай даирилири америка дөләт мәҗлисиниң хоңкоң демократийә намайишчилирини қоллиғанлиқиға етираз билдүрди

Хитай даирилири америка дөләт мәҗлисиниң 2014 - йиллиқ доклатида хоңкоң демократийә намайишчилирини қоллиғанлиқини хитайға қилинған «мәқсәтлик һуҗум» дәп етираз билдүрди.

Америка дөләт мәҗлисиниң хитай ишлар иҗраийә комитети пәйшәнбә күни елан қилған 2014 - йиллиқ доклатида «америка һөкүмити хоңкоң демократийә намайишчилирини қоллиши керәк» дәп көрсәткән иди.

Америкиниң мәзкур доклати хоңкоң студентлири хитайдин демократийә тәләп қилип елип бериватқан намайиш йеңи басқучқа киргән мәзгилдә елан қилинған иди.

Буниңға инкас қайтурған хитай ташқи ишлар министирлиқи баянчиси хоң лей америкиниң мәзкур доклатиға күчлүк етираз билдүридиғанлиқини ейтти.

Хоңкоң студентлири 2017 - йиллиқ хоңкоң район башлиқи сайлимини демократик усулда өткүзүшини тәләп қилип намайиш қиливатқан болуп, һөкүмәт тәрәп оқуғучиларниң тәләплиригә қошулмиған вә улар билән сөһбәткә келишни рәт қилған.

Пикирләр (0)
Share
Толуқ бәт