Sabiq teywen emeldari: Uyghurlargha özini özi idare qilish hoquqi bérilishi kérek

Muxbirimiz jüme
2014-10-11
Élxet
Pikir
Share
Print


Sabiq teywen hökümet xadimi xitay hökümitining Uyghurlargha özini özi idare qilish hoquqi bérishi lazimliqini bildürgen.

Teywen'ge jaylashqan "Junggo waqit géziti" ning xewer qilishiche, bu sözlerni teywenning mongghuliye we tibet ishliri komitétining sabiq katipi liyu shöyaw 9 - öktebir teybéy shehiride ötküzülgen özining yéngi kitabini tarqitish murasimda otturigha qoyghan.

Liyu ilgiri teywendiki ministir derijilik mongghul we tibet ishlar komitétida 40 yil xizmet qilghan bolup, uning yéqinda "Shinjangdiki térrorluq hujumlirining arqa körünüshi" namliq kitabi neshrdin chiqqan.

U muxbirlargha qilghan sözide xitay öz térritoriyisi ichidiki hujumlarni kémeytish üchün Uyghurlargha qaritilghan siyasetlirini tengshishi lazimliqini bildürgen.

U mundaq dégen: xitayning barliq mes'uliyetni atalmish "Üch xil küchler" ge artip qoyushi xata. Xitay hökümiti shinjanggha asasiy mu'essese we bayliq élip kirgen bolsimu, buningdin peqet xenzularla menpe'et éliwatidu.

U yene, Uyghur élide tinchliq berpa qilish üchün xitay hökümiti Uyghurlarning medeniy we diniy tuyghulirini hörmet qilishi kéreklikini bildürgen.

Xitay da'iriliri amérika dölet mejlisining xongkong démokratiye namayishchilirini qollighanliqigha étiraz bildürdi

Xitay da'iriliri amérika dölet mejlisining 2014 - yilliq doklatida xongkong démokratiye namayishchilirini qollighanliqini xitaygha qilin'ghan "Meqsetlik hujum" dep étiraz bildürdi.

Amérika dölet mejlisining xitay ishlar ijra'iye komitéti peyshenbe küni élan qilghan 2014 - yilliq doklatida "Amérika hökümiti xongkong démokratiye namayishchilirini qollishi kérek" dep körsetken idi.

Amérikining mezkur doklati xongkong studéntliri xitaydin démokratiye telep qilip élip bériwatqan namayish yéngi basquchqa kirgen mezgilde élan qilin'ghan idi.

Buninggha inkas qayturghan xitay tashqi ishlar ministirliqi bayanchisi xong léy amérikining mezkur doklatigha küchlük étiraz bildüridighanliqini éytti.

Xongkong studéntliri 2017 - yilliq xongkong rayon bashliqi saylimini démokratik usulda ötküzüshini telep qilip namayish qiliwatqan bolup, hökümet terep oqughuchilarning teleplirige qoshulmighan we ular bilen söhbetke kélishni ret qilghan.

Toluq bet