Тәйвән бир хитай җасусини җазалиди

Мухбиримиз җүмә
2017-09-16
Share

Җүмә күни тәйвән соти тәйвән дөләт мәхпийәтликини сетивелишқа урунған бир хитай җасусини 14 айлиқ қамақ җазасиға буйруди.

Тәйвән мәркизий агентлиқиниң хәвәр қилишичә, җу хоңшү исимлик бу хитай пуқраси тәйвән ташқи ишлар министирлиқидики бир һөкүмәт хадимиға пара берип униңдин мәхпий учурларни истигән.


Бу йил 29 яшқа киргән җу хоңшү әсли лявниңлиқ болуп, җеҗяң университетини пүттүргән. 

У, 2012-йилидин 2016-йилиғичә тәйвәндики даңлиқ чеңчи дөләтлик университетида кархана башқуруш кәспидә оқуған вә оқушни тамамлиғандин кейин хитайға қайтип кәткән. Әмма у, бу йил февралда мәбләғ селиш мәқситидә тәйвәнгә қайта кәлгән икән.

Хәвәргә қариғанда, даириләр әсли бу хитай пуқрасиға 5 йиллиқ кесим тәвсийә қилған болсиму, сот даирилири униң мәхпий учурларни елишта нәтиҗә қазиналмиғанлиқини көздә тутуп униңға 14 айлиқ қамақ җазаси бәргән.

Мәлум болушичә, җу йеқинлашқан тәйвән әмәлдари дәсләптила ишниң тәпсилатини дәрһал һөкүмәтниң мунасивәтлик тармақлириға мәлум қилған икән.

Хәвәргә қариғанда, җу, бу әмәлдарға бәргән мәхпий учур бәдилигә һәр 3 айда 10 миң доллар беришни вәдә қилған.

Җу бу йил марттин буян тутуп турулуватқан болуп, әмма хәвәрдә униң қачан вә қәйәрдә юқирида ейтилған һөкүмәт хадимиға йеқинлашқанлиқи тилға елинмиған.

1949-Йили хитай коммунистлири һакимийәт бешиға чиққандин бери, тәйвән-хитай арисида биваситә алақә үзүлгән. 

Һалбуки, хитай даирилири тәйвәнгә өз җасуслирини әвәтишни тохтатмиған.

Мәлум болушичә, тәйвән һәрбий саһәси хитай җасуслуқ органлириниң даимлиқ нишани икән.

2015-Йили 4 нәпәр пенсийигә чиққан тәйвән һәрбий әмәлдарини өз ичидә алған 5 нәпәр тәйвән пуқраси хитайға җасуслуқ қилиш җинайити билән әйибләңән.

Булар бир хитай армийиси офитсериға тәйвәнниң радар системиси вә заманиви күрәшчи айропиланлириниң мәхпийәтликини йәткүзгән икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт