Уйғур тәшкилатлири тәйвән «хәлқара диний әркинлик мунбири» ниң уйғурлар һәққидики ахбаратини қоллиди

Мухбиримиз әркин
2019-06-24
Елхәт
Пикир
Share
Принт

Уйғур тәшкилатлири 24‏-июн күни бирләшмә баянат елан қилип, 31‏-май күни тәйвәндә өткүзүлгән «хәлқара диний әркинлик мунбири» ниң уйғурлар һәққидики ахбаратини қоллайдиғанлиқини билдүргән. Тәйвәндики бу йиғин америкадики «хитай ярдәм җәмийити», «мирас фонди», «хитай кишилик һоқуқ тәйвән җәмийити» қатарлиқ тәшкилатлар вә тәйвәндики христиан диний гуруһлириниң саһибханилиқида өткүзүлгән. Униңға асия-тинч окян районидики 21 дөләттин кәлгән 80 дәк парламент әзаси, диний зат вә паалийәтчиләр қатнашқан.

Йиғинда бирләшмә ахбарат мақуллинип, асия-тинч окян районидики дөләтләрниң хитай һөкүмитини лагерларни тақашқа чақириши, явропа парламентида бирләшмә гуруппа тәшкилләп, уйғур, тибәт, хитай вә башқа хәлқләрниң диний әркинликиниң дәпсәндә қилинишини һәл қилиш, шәхсий ширкәтләрниң уйғур райониға назарәт қилиш, ирқий айримичилиқ, диний дәпсәндичилик вә уйғурларниң кәң көләмлик тутқун қилинишиға ярдәм беридиған программа вә әсвабларни сатмаслиқи, һөкүмәтләрниң бу хил һәмкарлиқ вә техника өтүнүп беришни чәклиши, пенсийә фонди яки вәхпиләр уйғурларни бастурушқа четишлиқ һәрқандақ ширкәтниң пай чекини тутмаслиқи, университетлар хитай маарип министирлиқи билән болған алақисини үзүши, хәлқаралиқ илмий хадимлар вә оқуғучилар лагерлар тақалмиғучә хитайниң юқири дәриҗилик маарип әмәлдарлири қатнашқан илмий алмаштуруш, йиғин вә зиярәтләргә иштирак қилмаслиқи қатарлиқ тәләпләр оттуриға қоюлған.

Ахбаратта: «кәң көләмлик явайи қилмишқа сүкүт қилиш җинайәтниң давамлишишиға йешил чирағ яққанлиқ, униңға қарита һечқандақ һәрикәт қолланмаслиқ битәрәплик әмәс. Бир һөкүмәтниң җазасиз һалда хәлқара өлчәмләргә хилаплиқ қилишиға йол қоюш, бу өлчәмләрни аҗизлаштуруп, башқа һөкүмәтниң униңға хилаплиқ қилишиға илһамландуриду» дейилгән. 24‏-Июн күни елан қилинған баянатни вакаләтсиз милләтләр тәшкилати, дуня уйғур қурултийи, уйғур игилик тиклигүчиләр тори, уйғур кишилик һоқуқ қурулуши вә уйғур һәрикити қатарлиқ тәшкилатлар елан қилған. Улар баянатида, өзлириниң бу чақириқни алқишлайдиғанлиқини билдүрүп: «парламентлар вә һөкүмәтләрни, шәхсий кархана, илмий хадимлар, университетларни һәм б д т ни хитайда диний етиқад, ибадәт әркинлики вә өз кимликини әркин ипадиләшниң пүтүнләй йоқитилишиға қарши җиддий һәрикәткә өтүшкә үндәймиз» дегән.

Пикирләр (0)
Share
Толуқ бәт