Uyghur teshkilatliri teywen "Xelq'ara diniy erkinlik munbiri" ning Uyghurlar heqqidiki axbaratini qollidi

Muxbirimiz erkin
2019-06-24
Share

Uyghur teshkilatliri 24‏-iyun küni birleshme bayanat élan qilip, 31‏-may küni teywende ötküzülgen "Xelq'ara diniy erkinlik munbiri" ning Uyghurlar heqqidiki axbaratini qollaydighanliqini bildürgen. Teywendiki bu yighin amérikadiki "Xitay yardem jem'iyiti", "Miras fondi", "Xitay kishilik hoquq teywen jem'iyiti" qatarliq teshkilatlar we teywendiki xristi'an diniy guruhlirining sahibxaniliqida ötküzülgen. Uninggha asiya-tinch okyan rayonidiki 21 dölettin kelgen 80 dek parlamént ezasi, diniy zat we pa'aliyetchiler qatnashqan.

Yighinda birleshme axbarat maqullinip, asiya-tinch okyan rayonidiki döletlerning xitay hökümitini lagérlarni taqashqa chaqirishi, yawropa parlaméntida birleshme guruppa teshkillep, Uyghur, tibet, xitay we bashqa xelqlerning diniy erkinlikining depsende qilinishini hel qilish, shexsiy shirketlerning Uyghur rayonigha nazaret qilish, irqiy ayrimichiliq, diniy depsendichilik we Uyghurlarning keng kölemlik tutqun qilinishigha yardem béridighan programma we eswablarni satmasliqi, hökümetlerning bu xil hemkarliq we téxnika ötünüp bérishni cheklishi, pénsiye fondi yaki wexpiler Uyghurlarni basturushqa chétishliq herqandaq shirketning pay chékini tutmasliqi, uniwérsitétlar xitay ma'arip ministirliqi bilen bolghan alaqisini üzüshi, xelq'araliq ilmiy xadimlar we oqughuchilar lagérlar taqalmighuche xitayning yuqiri derijilik ma'arip emeldarliri qatnashqan ilmiy almashturush, yighin we ziyaretlerge ishtirak qilmasliqi qatarliq telepler otturigha qoyulghan.

Axbaratta: "Keng kölemlik yawayi qilmishqa süküt qilish jinayetning dawamlishishigha yéshil chiragh yaqqanliq, uninggha qarita héchqandaq heriket qollanmasliq bitereplik emes. Bir hökümetning jazasiz halda xelq'ara ölchemlerge xilapliq qilishigha yol qoyush, bu ölchemlerni ajizlashturup, bashqa hökümetning uninggha xilapliq qilishigha ilhamlanduridu" déyilgen. 24‏-Iyun küni élan qilin'ghan bayanatni wakaletsiz milletler teshkilati, dunya Uyghur qurultiyi, Uyghur igilik tikligüchiler tori, Uyghur kishilik hoquq qurulushi we Uyghur herikiti qatarliq teshkilatlar élan qilghan. Ular bayanatida, özlirining bu chaqiriqni alqishlaydighanliqini bildürüp: "Parlaméntlar we hökümetlerni, shexsiy karxana, ilmiy xadimlar, uniwérsitétlarni hem b d t ni xitayda diniy étiqad, ibadet erkinliki we öz kimlikini erkin ipadileshning pütünley yoqitilishigha qarshi jiddiy heriketke ötüshke ündeymiz" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet