Uyghur aptonom rayonidiki téz pochta mulazimiti waqitliq toxtitilghan

Muxbirimiz erkin
2017-10-13
Share

Uyghur aptonom rayonining nurghun jaylirida téz pochta mulazimiti toxtitilip, hetta bezi jaylarda mulazimet merkezliri waqitliq taqalghan. Xitay axbarat wasitilirining bildürüshiche, bu, da'irilerning 19‏-qurultaydin burun alghan muqimliq tedbirlirining bir qismi iken.

Xitay kompartiyesining 19‏-qurultiyi 18‏-öktebirde bashlinidu. Uyghur aptonom rayonluq partkomning sékrétari chén chüen'go yéqinda yerlik xewpsizlik organlirining mes'ulliridin qurultay mezgilide "Chong-kichik" herqandaq bir weqe chiqishning qet'iy aldini élishni telep qilghan. Yerlik da'iriler 12‏-öktebir chiqarghan uqturushida, yük aptomobillirining qatnishini toxtitip, mal toshush ponkitlirining mulazimitini waqitliq toxtatqan.

Téz pochta yollanma mulazimitini toxtitish ishi béyjingning qismen jayliridimu yolgha qoyulghan. Xitayda chiqidighan "Yer shari waqti géziti" ning 11‏-öktebirde bergen xewiride, bu tedbirning béyjingdimu yolgha qoyulghanliqini, lékin pütünley toxtitilmighanliqini ilgiri sürgen.

Mezkur xewerde bayan qilishiche, béyjingdin salidighan we béyjinggha kélidighan téz pochta yollanmilirini tekshürüsh kücheytilip, tapshuruwélish waqti uzarghan. Xewerde yene tekshürüsh tüzümining tibet we Uyghur aptonom rayonidin kélidighan yaki bu rayonlargha betküzilidighan we yaki bu rayonlardin ötidighan téz pochta yollanmiliridimu kücheytilgenliki bildürülgen idi.

Biraq ürümchidiki melum pochta yollanmilirini téz yetküzüsh shirkitining bir xadimi 13‏-öktebir radiyomizgha rayondiki bezi jaylarda téz yollanma mulazimitining toxtitilghanliqini delillep, "Uning qachan eslige kélidighanliqi melum emes" dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.