Xitay hawa armiyisinig sabiq siyasi komissari tekshürüsh astigha élindi

Muxbirimiz ümidwar
2016-07-10
Share


2009 - Yilidiki 5 - iyul ürümchi weqesi mezgilide xitay xelq azadliq armiyisining Uyghur rayonida herbiy siyasiy qomandanliq wezipisi ötigen, xitay azadliq armiyisi hawa qisimlirining sabiq siyasiy komissari tekshürüsh astigha élindi.

B b s agéntliqining xitay hökümet metbu'atlirining uchurliri asasida xewer qilishiche, xitay xelq azadliq armiyisi hawa qisimlirining sabiq siyasiy komissari général polkownik tyen shusi “Intizamgha éghir xilapliq qilish” dégen nam astida délo turghuzulup tekshürüsh astigha élin'ghan.

Général polkownik tyen shusi 18 yéshida herbiy xizmitini xitay xelq azadliq armiyisining “Shinjang herbiy rayoni”gha qarashliq 54 - topchilar polkida jengchi bolushtin bashlap, “Jenubiy shinjang herbiy rayoni”ning siyasiy komissariliq derijisigiche ösken we 2005 - yilidin 2009 - yili 12 - ayghiche, yeni 2009 - yilidiki 5 - iyul ürümchi weqesi waqtida, shinjang herbiy rayonining partiye sékrétari, siyasiy komissari we aptonom rayonluq partkom da'imiy hey'et ezasiliq wezipilirini atqurghan idi.

Tyen shusi 1985 - yili xitay bilen wyétnam arisidiki lawshen urushigha qatnashqan.

U, shuningdin kéyin qedemmu - qedem ösüp, 2012 - yilidin 2015 - yilighiche, xitay hawa armiyisi partkom sékrétari we siyasi komissari bolghan, 2015 - yili, 8 - ayda herbiy septin ayrilip, memliketlik xelq qurultiyining tashqi ishlar komitétining mu'awin mudiri bolghan idi.

66 Yashliq tyen shusi 5 - iyul küni herbiy intizam tekshürüsh komitéti teripidin a'ilisidin élip kétilgen, uning ayali we uning bir qanche xizmetchilirimu élip kétilgen iken. U, xitay armiyisining shü seyxo, gu boshung qatarliq ikki général polkowniktin kéyin, tekshürüsh astigha élin'ghan üchinchi général polkownik iken.

Emma hazirche tyen shusigha qandaq jinayet artilidighanliqi namelum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet