Xitay hökümitining tiyen'enmén herikiti ishtirakchilirini sistémiliq qiynap kelgenliki otturigha qoyuldi

Jüme küni amérika dölet mesiliside chaqirilghan guwahliq bérish yighinda tiyen'enmén oqughuchilar herikiti guwahchiliri eyni yildiki basturushni eslep ötti we xitay hökümitining tiyen'enmén herikiti ishtirakchilirini sistémiliq qiynap kelgenliki otturigha qoyuldi.

Yighinni amérika dölet mejlisi tashqi munasiwet komitétigha qarashliq kishilik hoquq tarmaq komitéti chaqirghan.

Yighinda 1989 - yilidiki tiyen'enmén oqughuchilar herikiti pa'aliyetchiliridin adam chén, yang jyenli we chey ling qatarliq besh neper pa'aliyetchi qatnashti.

Yighinda söz qilghan chén, 1989 - yilidiki démokratik heriket qanliq basturulghanliqigha 25 yil bolghan bolsimu, xitay kommunist partiyesining mezkur weqediki xataliqini hazirghiche étirap qilmay kelgenlikini otturigha qoydi.

Dölet mejlisi ezasi kirstofér smit xitay hökümitining tiyen'enmén ishtirakchilirini hazirghiche qiynap kelgenlikini bildürüp mundaq dédi: xitay hökümiti ulargha intayin wehshiylerche mu'amile qildi we ularni sistémiliq qiynap keldi.

U yene obama hökümitini mezkur mesilige kelgende xitay hökümitige qattiqraq bolushqa chaqirdi.

Xitay hökümiti 1989 - yildiki oqughuchilar herikitini tankilar bilen basturghan. Xitay hökümet terep mezkur basturushta 246 adem ölgenlikini élan qilghan bolsimu, bezi musteqil tetqiqat organliri ölgen adem sanining 500din 2 minggha yétidighanliqini bildürüshken.

Mezkur weqe yene “Tiyen'enmén qirghinchiliqi” depmu atalghan idi.