Узра зия рәсмий һалда тибәт мәсилилири бойичә маслаштурғучилиққа тәйинләнди

Мухбиримиз әзиз
2021.12.20

Америка ташқи ишлар министири антони билинкен әпәнди 20-декабир күни рәсмий һалда ташқи ишлар министирлиқи қармиқидики “пуқралар бихәтәрлики, демократийә вә кишилик һоқуқ” комитетиниң рәиси узра зия ханимни тибәт мәсилилири бойичә алаһидә маслаштурғучилиққа тәйинлиди.

Америка ташқи ишлар министирлиқиниң тор бетидә елан қилинған бу һәқтики уқтурушта ейтилишичә, ‍униң бу қетимлиқ вәзипигә тәйинлиниши 2002-йили мақулланған “тибәт сиясити қануни” бойичә ишқа ашқан. Шу сәвәбтин униң бир муһим вәзиписи хитай һөкүмити билән далай лама, шундақла демократик усулда сайлап чиқилған муһаҗирәттики тибәт рәһбәрлири оттурисидики сөһбәтни алға сүрүш болидикән. Шуниң билән биргә тибәт районидики кишилик һоқуқ вә әркинлик мәсилиси, җүмлидин тил, мәдәнийәт вә диний етиқад қатарлиқ саһәләрдики әркинликни һимайә қилишқа күч чиқиридикән. Узра зия ханим йеқинда чақирилған “дуня демократийә мәҗлиси” дә уйғурлар вә тибәтләрниң һәқлири тоғрисида мәхсус сөз қилип йиғин әһлиниң қизғин алқишиға еришкән иди.

Йиллардин буянқи сиясий паалийәтләр җәрянида уйғур тәшкилатлириму америка һөкүмитидин ташқи ишлар министирлиқида уйғурлар мәсилиси бойичә мәхсус мәлуматчи тәсис қилишни тәләп қилип келиватқаниди. Уйғурларға даир қанун лайиһәлириниң арқиму-арқидин үстүн аваз билән мақуллиниши сәвәбидин бәзиләр бу җәһәттики үмидләрниң бәзи шолиси намаян болмақта, дәп қаримақтикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.