Хитай 20 йил нәзәрбәнд қилған бәнчән ламаниң қанунлуқ избасари һәққидә тунҗи қетим еғиз ачқан

Мухбиримиз қутлан
2015-09-07
Share

Бирләшмә агентлиқниң хәвиригә қариғанда, хитай һөкүмити йеқинда 20 йилдин буян нәзәрбәнттә туруватқан бәнчән ламаниң қанунлуқ избасари нийима һәққидә тунҗи қетим еғиз ачқан.

Мәлумки, тибәт буддизминиң иккинчи даһийси бәнчән лама 1989-йили аләмдин өткән. 1995-Йилиға кәлгәндә тибәтләрниң роһаний даһийси далай лама әмдила 6 яшқа киргән гедһун нийимани бәнчән ламаниң қанунлуқ избасари дәп елан қилған.

Һалбуки, хитай һөкүмити әйни чағда әмдила 6 яшқа киргән нйимани нәзәрбәнд қилип, уни тибәтләрниң көзидин йирақ қилған. Шундин буян униң из-дерики болмиған. Сүргүндики тибәт һөкүмити буниңға инкас қайтуруп нйимани "дунядики әң яш сиясий тутқун" дәп тәсвирлигән.

6-Сентәбир күни шинхуа агентлиқи тибәт аптоном районлуқ бирликсәп бөлүминиң әмәлдари норбу дондупниң сөзини нәқил кәлтүрүп мунуларни тәкитлигән: "нийима һазир сағлам һәм нормал һаятта яшимақта. У давамлиқ маарип тәрбийиси еливатиду. У һечкимниң өзини аварә қилишини халимайду."

Хитай һөкүмити әйни чағда далай лама билән тибәт хәлқиниң ирадисигә қарши һалда норбу исимлик башқа бир тибәтликни 11-бәнчән ламалиққа тәйинлигән. Хитай һөкүмити тәйинлигән бәнчән лама нөвәттә хитай мәмликәтлик сиясий кеңәшниң муавин рәислик вәзиписини өтимәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт