Yarlu zangbu deryasi süyini teklimakan'gha bashlash pilanining xam xiyal ikenliki ilgiri sürüldi

Muxbirimiz jüme
2017-11-11
Élxet
Pikir
Share
Print

Xitayning tibettin tonil ariliq Uyghur élige su yötkeshni oylishiwatqanliqi xewer qilin'ghandin kéyin otturigha chiqqan mulahizilerde buning bir xam xiyal ikenliki ilgiri sürülmekte.

Xongkongdin chiqidighan "Jenubiy xitay seher géziti" de bu hepte élan qilin'ghan bir xewerde xitay inzhénérlirining yarlu zangbu deryasi süyini teklimakan qumluqigha bashlaydighan 1 ming kilométirliq tonil yasashni pilan qiliwatqanliqi körsitilgen idi. 

Xewerde mezkur tonilning tibet égizlikidin bashlinidighanliqi, bir nechche yerde sharqiratmilar arqiliq tutashturulup, axiri teklimakandiki su menbelirige ulinidighanliqi ilgiri sürülgen. 

Xewerge qarighanda, xitay inzhénérliri bu yil awghusttin buyan yünnen ölkiside 600 kilométirliq bir su yetküzüsh tonili yasashqa bashlighan. Bu tonilgha ikki yuqiri süretlik poyiz sighidighan bolup, tonillar déngiz yüzidin nechche ming métir égizliktiki tagh choqqiliridin ötidiken. 

Xewerde tetqiqatchilarning éytqanliridin neqil élip körsitishiche, yünnende yasiliwatqan bu su tonilini kelgüside yasilish pilan qilin'ghan tibet-teklimakan su tonilining sinaq nusxisi déyishkimu bolidiken. 

Halbuki, awstraliyediki kelgüsi yölinishler namliq xelq'araliq tetqiqat instituti bu qurulush pilanining emelge ashmaydighanliqini körsetken. 

Ular, jüme küni élan qilghan bu heqtiki mulahize maqaliside, xitayning qoshna eller bilen bolghan munasiwetliri, téxnologiye we gé'ologiyilik ré'alliqlar tüpeyli mezkur qurulushning royapqa chiqmaydighanliqini körsetken. 

Mulahizige qarighanda, tibettin bashlinidighan su menbesining hindistan qatarliq qoshna ellerge tutishidighanliqi seweblik, yarlu zangbu deryasi süyini bashqa yaqqa bashlap kétish, ezeldin su qis bolghan hindistanda keskin inkas qozghaydiken. 

Mulahizide neqil qilishiche, bu heqte toxtalghan sürgündiki tibet hökümitining bash ministiri lobsang sanggay xitayning bu qurulushini "Su bombisi" dep atighan we bu qurulushning toqunush keltürüp chiqirishidin endishe qilidighanliqini bildürgen. 

Uningdin bashqa xitayda nöwette bundaq murekkep su bashlash qurulushini wujudqa chiqarghudek téxnika hazirlanmighanning üstige, tibet égizlikidiki gé'ologiyilik ré'alliq xitayning mezkur pilanigha zor riqabetlerni élip kélidiken.

Toluq bet