Amérikada bir oqughuchi tik tok ni eyiblep sot mehkimisige erz qildi

Muxbirimiz erkin
2020.07.13

Amérikaning kaliforniye shtatida bir oqughuchi xitayning widiyo hembehirlesh yumtali-tiktokni (Tik Tok) abontlarning shexsiy uchurini qanunsiz toplash we xitaygha yollash bilen eyiblep sot mehkimisige erz qilghan. Roytérs agéntliqining bildürüshiche, bu erz amérikada tiktok toghrisidiki qanuniy ixtilapni kücheytishi mumkin iken. Tiktok xitayning béyjing shehiridiki “Zijyé tyawdong téxnologiye shirkiti” ning igidarchiliqida bolup, bu shirket alliqachan amérika hökümitining dölet bixeterlik tekshürüshige duch kelgen.

Amérika hökümiti tiktokning abontlarning uchurini toplash, sezgür siyasiy mezmunlarni cheklishige qarita tekshürüsh bashlighan. “Zijyé tyawdong shirkiti” yene xitay hökümitining Uyghur diyarida digital nazaret sistémisi qurup, Uyghurlarni teqiblishige yardem bérish bilen eyiblinip kelgen. Roytérs agéntliqining bildürüshiche, shimaliy kaliforniye rayonluq fédératsiye sot mehkimisige sunulghan erzde, tiktok “Abontlarning zor miqdardiki shexsiy uchurini oghriliqche toplap, xitaydiki mulazimet torlirigha yollash” bilen eyiblen'gen.

Bu erzni misti xong isimlik bir qiz oqughuchi sun'ghan bolup, u özining 2019-yili tiktok yumtalini yükligenliki, lékin resmiy abont bolmighanliqi, biraq uning xewirisiz tiktokning uninggha hésab échip, uning élan qilmighan shexsiy uchur we widéyolirini tarqatqanliqini bildürgen.

Erzde ilgiri sürülüshiche, tiktok qiz oqughuchining uchurini xitaydiki “Bugly.qq.com” we “umeng.com” namliq ikki torgha yollap bergen. “Bugly” bilen “Umeng” xitayning “Téngshün” we “Alibaba” shirketlirining igidarchiliqida bolup, xitayning ataqliq ijtima'iy alaqe yumtali ündidarmu xitaygha qaraydu. Ündidar yumtal xitayning 2017-yili bashlan'ghan chong tutqunida 3 milyondek Uyghurning lagérlargha qamilishi we qamaqqa höküm qilinishida halqiliq rol oynighanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.