“тик-ток” һәққидики гуваһлиқ йиғинида уйғур қирғинчилиқи йәнә бир қетим муһим тема болди

Вашингтондин мухбиримиз әзиз тәйярлиди
2024.02.01

31-январ күни америка дөләт мәҗлисидә өткүзүлгән гуваһлиқ йиғинида “тик-ток” ниң баш иҗраийә әмәлдари җу шовзи (Shou Zi Chew) йәнә бир қетим америка сиясийонлириниң кәскин соаллириға дуч кәлди.

Америка кеңәш палатасиниң әзаси том каттон (Tom Cotton) соал сораш нөвити кәлгәндә униңдин “сиз америка һөкүмити (трамп һөкүмити вә байдин һөкүмити) ейтқан ‛хитай һөкүмити уйғурларға қарши қирғинчилиқ қиливатиду‚ дегән һөкүмгә қошуламсиз? ” дәп сориған. Җу шовзи гәпни башқа яққа бурап “тик-ток” мунбириниң башқиларниң һәрқандақ тема һәққидики һәрқандақ пикригә һөрмәт қилидиғанлиқини тәкитлигән. Шуниң билән том каттон униңдин қайта-қайтилап “хитай һөкүмити уйғурларға қарши қирғинчилиқ қиливатамду? ” дегән соални икки қетим сориған болсиму, у йәнила гәпни елип қачқан. Униң хупсәнлик билән гәп йорғилитишидин кейин том каттон “пирезидент байдин илгири ши җинпиңни ‛диктатор‚ дәп атиған. Сиз буниңға қошуламсиз? ” дәп сориғанда, у “мән һечқачан, һечқандақ дөләтниң рәһбиригә баһа бәрмәймән” дегән.

Бу қетимқи гуваһлиқ йиғинидин кейин җу шовзиниң уйғурлар мәсилисидә йәнә бир қетим гәп йорғилитиши, һәр саһәниң күчлүк диққитини қозғиған. Шу қатарда NBA ниң сабиқ топчилиридин әнәс кәнтәр өзиниң X бетидә учур йоллап “җу шовзиниң уйғур қирғинчилиқи һәққидики соалға җаваб бериватқан һалитигә қараңлар. Униң көзидики қорқунчни көрүватамсиләр?” дегән. Шуниңдәк “гугул” , “ютуб”, “фейсбук” қатарлиқ әпләрниң хитайда мәни қилинғанлиқи, әмма хитай компартийәси контроллуқидики “тик-ток” ниң америка тәвәсидә әркин яйрап назарәт вә яшларниң меңисини ююш билән мәшғул болушиға йол қоюлуватқанлиқини тәнқидлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.