Уйғур районида ечилған тил-йезиқ йиғинида хитай тилини йәниму омумлаштуруш тәләп қилинған

Мухбиримиз җәвлан
2022.08.05
Share on WhatsApp
Share on WhatsApp

Хитай таратқулириниң 5-авғуст күнидики хәвиригә қариғанда, йеқинда уйғур аптоном районлуқ тил-йезиқ хизмити йиғини ечилған болуп, уйғур районидики барлиқ мәктәпләрдә “дөләт тили” оқутушиниң сүпитини өстүрүш, яш-өсмүрләрниң “дөләт тили” да сөзләш вә йезиш қабилийитини ашуруш, “дөләт тили” ниң омумлишиш дәриҗисини йәниму юқири көтүрүш тәкитләнгән.

Униңдин башқа, дөләт органлири вә аммиви мулазимәт орунлирида “дөләт тили” ни өлчәмлик қоллиниш, һәр милләт аммисиниң бу тилни өгиниш қизғинлиқини ашуруш, хитайчә өгиниш арқилиқ хитай мәдәнийитини чүшиниш вә “җуңхуа милләтлири ортақ еңи” ни бәрпа қилиш нишани көрситилгән.

Хәвәрдә ейтилишичә, бу йиғинда йәнә “аз санлиқ милләтләрниң өз тилини қоллиниш һоқуқиға капаләтлик қилиш, өз мәдәнийәтигә варислиқ қилишини илгири сүрүш, һәр милләтниң бир-бириниң тилини өгинип өзара чүшинишни чоңқурлаштуруш керәк” дейилгән болсиму, асаслиқ нишанниң йәнила хитайчини вә хитай мәдәнийитини омумлаштуруш икәнлики ениқ көрситилгән.

Тил билән мәдәнийәт бир-биригә зич бағланған болуп, хитай һөкүмити 2000-йиллардин башлапла хитайтили вә хитай мәдәнийитини уйғурларға теңишни мәктәпләр арқилиқ башлиған болса, 2017-йилдин кейин йиғивелиш лагерлири вә йетимханиләр арқилиқ техиму әшәддий усулда давам қилған. Канада виндсор университети қанун факултетиниң профессори винсент воң (Vincent Wong) радийомизға бәргән зияритидә хитай һөкүмитиниң мәктәпләр арқилиқ уйғур тилини йоқитиватқанлиқини көрситип: “бу мәктәпләр балиларни уйғур тилидин, уйғур тарихидин вә уйғур мәдәнийитидин пүтүнләй айриветиш үчүн лайиһиләнгән. Улар балиларни кәлгүсидә өзиниң тилини, тарихини, келип чиқишини билмәс қиливетиду,” дегәниди.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.