Дуня тинчлиқ тәшкилати: "уйғурларға қаритилған назарәт-хитай йеңидин инсанийәт кризисини бихландурмақта"

Мухбиримиз ирадә
2019-05-27
Share

27-Май күни дуня тинчлиқ тәшкилатиниң тор бетидә хитай һөкүмитиниң уйғурларға йүргүзүватқан чекидин ашқан сиясәтлири тонуштурулди.

Мәзкур мақалидә хитайниң ғәрбий қисмиға җайлашқан вә хитай һөкүмити бекиткән рәсмий нами "шинҗаң уйғур аптоном райони" болған бу земинда әсирләрдин бери яшап келиватқан йәрлик уйғурларға наһайити қаттиқ зулум сиясити йүргүзүлүватқанлиқи, хитай һөкүмитиниң районда 1милйондин 3 милйонғичә уйғурни "қайта тәрбийә" намида тутқун қилип, меңә ююш һәрикити йүргүзүватқанлиқи баян қилинған.

Мақалидә кишилик һоқуқни көзитиш тәшкилатиниң йеқинда райондики юқири техникилиқ назарәт системиси арқилиқ уйғурларниң қандақ қилип искәнҗигә елиниватқанлиқи һәққидики доклати тәпсилий тонуштурулғандин кейин мунулар баян қилинған:

"шинҗаңдики вәзийәт қаттиқ еғирлишип, йеңи бир инсанийәт кризиси бихлинишқа башлиди. Түркийә, явропа вә америка қатарлиқ дөләтләрдә панаһлинип яшаватқан уйғурларниң аилиси билән болған алақиси пүтүнләй үзүлди. Әгәр улар алақә қилған тәқдирдә, уларниң аилә-тавабиатлири соал-сораққа, тутқун қилиниш вә һәтта қейин-қистаққа елиниши мумкин. Бир инсанниң ғуруриға қилинған бундақ таҗавуз чоқум хәлқара җамаәт тәрипидин әйиблиниши керәк. Бирләшкән дөләтләр тәшкилатиниң бу мәсилә һәққидә районда тәкшүрүш елип бериш мәҗбурийити бар"

Дуня тинчлиқ тәшкилатиниң тор бетидики бу мақалидә һазир хитай һөкүмитиниң барлиқ имканлиридин пайдилинип, әмәлийәтни инкар қиливатқанлиқи, йәни бу мәсилиниң һазир бир мәйдан тәшвиқат уруши сәвийәсидә тохтап қеливатқанлиқи әскәртилип, "әгәр хәлқаралиқ органлар дәрһал һәрикәткә келип тәкшүрүшни башлимиса, қуруқ сөзниң у йәрдә зулум көрүватқан уйғурларға һечқандақ әмәлий пайдиси болмайду," дейилгән.

Мақалидә кишилик һоқуқни бундақ еғир дәпсәндә қилғанлиқи үчүн хәлқара җәмийәтниң хитай һөкүмитини җазаға тартишида америка, әнглийә, фирансийә вә германийәниң тарихи мәсулийити бар икәнлики әскәртилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт