Тонулған шаир ғоҗимуһәммәд муһәммәд хотәндә вапат болған

Мухбиримиз ирадә
2018-07-12
Елхәт
Пикир
Share
Принт

Тонулған шаир ғоҗимуһәммәд муһәммәдниң туюқсиз йүз бәргән йүрәк қан томур йерилиш сәвәби билән 7-айниң 12-күни күни 47 йешида вапат болғанлиқи илгири сүрүлмәктә.

Шаирниң хотән вилайәтлик хәлқ дохтурханисида җан үзгәнлик хәвири иҗтимаий таратқулар арқилиқ мәлум болғандин кейин, униң әсәрлирини яқтуруп оқуйдиған вәтән ичи вә чәтәлләрдики уйғур оқурмәнлири чоңқур қайғуға чөмди.

Мәрһум шаир ғоҗимуһәммәд муһәммәд 1990-йилларниң ахирлири 2000-йилларниң башлиридин тартип өзиниң бир йүрүш надир шеирлири билән уйғур әдәбиятида көзгә көрүнүшкә башлиған. У 1990-йили «йеңи қаштеши» журнилида елан қилған «мениң җәннитим» намлиқ шеири билән әдәбият саһәсигә кирип кәлгән. Униң һазирғичә һәр қайси мәтбуатларда 2000 парчидин артуқ шеир вә нәсрлири елан қилинған. Униң «муқам», «шараб хумари», «мәшрәп чөли», «әрниң иппити», «рәзил аптап», «дутарчи аял» намлиқ 50 парчиға йеқин шеирлири юқири бәдиий маһарәт вә өзгичә шеирий чоңқурлуқ билән яш оқурмәнләрниң алаһидә алқишларға еришкән. Шаирниң «ишикни ечип қойдум», «өлүм йилнамиси», «тарих», «рәңдар сөзләр» қатарлиқ нәччә онлиған шеирлири инглиз вә япон тиллириға тилиға тәрҗимә қилинип «чеграсиз сөзләр» намлиқ хәлқаралиқ шеирийәт журналлирида елан қилинған.

Чәтәлләрдики уйғур әдиблириниң билдүрүшичә, ғоҗимуһәммәд муһәммәд һазирқи заман уйғур шеирийитидики заманиви ипадә услуби билән шеирий бошлуқни уйғур классик шеирийитидин келиватқан әнәниви роһ билән суғарған икән. Униң шеирлирида уйғур тилиниң чәксиз ипадә пасаһити билән қәдимий мәдәнийәткә тоюнған бир хәлқниң бүгүнки җиддий тарихий өзгиришләр ичидики мәниви дуняси интайин маһирлиқ билән ипадиләнгән икән. Шаир ғоҗимуһәммәд муһәммәдниң бир қисим шеирлирини инглизчиға тәрҗимә қилған харвард университетиниң доктор аспиранти җошува фриман «чеграсиз сөзләр» журнилиға язған обзорида «ғоҗимуһәммәд муһәммәд бүгүнки уйғур йеңи шеирийитиниң авангартлиридин биридур,» дәп баһа бәргән.

Игилишимизчә, шаирниң 10 том қилип топланған шеирлар топлими мәркизи милләтләр нәшрияти тәрипидин 2016-йилидин тартип нәшр қилинишқа башлиған икән. Һалбуки, дәсләпки 4 томи тарқитилған болсиму, лекин алдинқи йилидин башлап қалған томлири даириләр тәрипидин бастуруп қоюлған.

Шаирниң туюқсиз вапати чәтәлләрдики уйғур зиялийлирини чоңқур ойға салди. Гәрчә кейинки бир-икки йилдин буян шаир ғоҗимуһәммәд муһәммәдниң уйғур диярида қандақ қисмәтләргә дуч кәлгәнлики һәққидә һечқандақ мәлумат болмисиму, әмма шаирниң йүрәк кесили билән 47 йешида туюқсиз қаза қилиши нурғун соалларни пәйда қилмақта. Радийомиз шаириниң туюқсиз вапати һәққидә мәлумат игиләшкә тиришқан болсиму, әмма нөвәттә уйғур диярида давамлишиватқан қаттиқ телефон контроллуқи сәвәблик бу хәвәрни өз алдиға дәлилләш имканийити болмиди.

Мәрһум шаир ғоҗимуһәммәд муһәммәд 1197-йили 9-айниң 27-күни гума наһийәсиниң қоштағ йезисида туғулған иди.

Пикирләр (0)
Share
Толуқ бәт