Шәрқий җәнуби асия дөләтлири 10 йилдин буян хитай хаккерлириниң һуҗумиға учрап кәлгән

Америкидики хәлқаралиқ интернет бихәтәрлики ширкәтлиридин “отлуқ көз ширкити” дүшәнбә күни доклат елан қилип, “шәрқий асия дөләтлири вә хитайниң җәнубидики қошниси һиндистанниң 10 йилдин буян хитай тор хаккерлириниң тор һуҗумиға учрап кәлгәнлики” ни билдүрди.

Доклатта дейилишичә AP 30 дәп нам берилгән хаккерлар хитайда ишләнгән юмшақ детални қоллинип, шәрқий җәнуби асия дөләтлири вә һиндистанниң һөкүмәт, сода ширкәтлириниң тор бекәтлиригә кирип, бу дөләтләрниң һөкүмәт хизмити, һәрбий учурлар вә иқтисадий учурларни оғрилаш билән шуғулланған вә бу хаккерлиқ һуҗумини 10 йилдин буян давамлаштуруп кәлгән.

Интернет бихәтәрлик ширкити （FireEye） ниң асия тинч окян райони техник йетәкчиси брайис боран әпәнди мәзкур ширкәтниң тор бекитидә бу һәқтә тохтилип,“APT30 хаккерлиқ һәрикитиниң мәқсити ениқ һалда хитайниң дөләт мәнпәәтигә мунасивәтлик икәнлики билинип турупту, биз игилигән барлиқ йип учлири бу хаккерлиқ һәрикитиниң арқисида хитай һөкүмити барлиқини көрсәтмәктә. Биз бу хуласини пәқәт бирла пакитқа асасән чиқармидуқ” дегән.