Uyghur élide "Shinjangning töt tarixini toghra tonush" teshwiqat herikiti bashlan'ghan

Muxbirimiz irade
2019-01-17
Élxet
Pikir
Share
Print

Uyghur élidiki nahiyelerni asas qilghan asasiy qatlamda "Qish mezgillik on ming kishilik teshwiqat pa'aliyiti" bashlan'ghanliqi melum.

"Aqsu géziti" tarqatqan bir xewerge qarighanda, mezkur teshwiqat herikitining asasliq mezmuni "Shinjangning junggoning ayrilmas bir qismi" ikenlikini tonush, "Shinjangdiki her millet xelqining jungxu'a milliti bilen qandash ikenlikini tonush", "Shinjangdiki her millet medeniyitining jungxu'a medeniyitining bir qismi ikenlikini tonush" qatarliq mezmunlarni öz ichige alidiken.

"Shinjangning töt tarixini toghra tonush" dep atalghan bu teshwiqat herikitining hazir Uyghur élining herqaysi jaylirida keng omumlashturuluwatqanliqi melum.

Uyghur aptonom rayonluq partkomning mu'awin sékrétari li péngshin, Uyghur aptonom rayonluq partkom teshwiqat bölümining bashliqi tyen wén qatarliqlar yéqinda arqimu-arqidin maqale élan qilip, shinjangning qedimki tarixini hazirqi weziyettiki muqimliq shizmitining éhtiyaji üchün xizmet qildurush lazimliqini alahide tekitligen idi.

Chet'ellerdiki közetküchilerning bildürüshiche, xitay hökümiti emdiki nishanini Uyghur élige munasiwetlik tarix sahesige qaritip, tarixni siyasetke maslashturush herikitini kücheytmektiken.

Xitay da'iriliri Uyghur élide 2 milyon'gha yéqin kishini lagérgha qamash, lagér sirtidikilernimu türlük-tümen teshwiqat heriketlirige qatnashturush arqiliq ulargha 'men junggoluq', 'wetinim junggo', 'millitim jungxu'a milliti' dégenlerni singdürüshke urunuwatqanliqi melum. Chet'ellerdiki Uyghur közetküchiler yene xitay hökümitining Uyghurlarni özining milliy we diniy kimlik éngini yoqitishqa, tarixta qurghan musteqil döletlirini untushqa mejburlawatqanliqini bildürmekte.

Toluq bet