Prézidént tramp: "Iranning özgiridighan waqti yétip keldi"

Muxbirimiz erkin
2018-01-01
Share

Ötken hepte iranda partlighan hökümetke qarshi keng kölemlik namayishning yéngi yil mezgilidimu dawam qilghanliqi melum.

Birleshme agéntliqning iran axbarat wasitiliridin neqil keltürüp xewer qilishiche, 31‏-dékabir iranning her qaysi jayliridiki naraziliq namayishlirida 10 adem ölgen. Buning bilen namayish partlighandin buyan ölgen adem sani 12 ge yetken. 200 Din artuq adem yarilan'ghan. Xewerlerde téhran, isfahan, gherbiy ezerbeyjan qatarliq rayonlarda az dégende 370 din artuq adem tutqun qilin'ghanliqi ilgiri sürülmekte.

Amérika prézidénti donald tramp yéngi yilning birinchi küni twittér arqiliq élan qilghan bayanatida, iranda özgirish waqtining yétip kelgenlikini bildürgen. Prézidént tramp bayanatida "Iran obama hökümiti bilen imzalighan berbat kélishimge qarimay, her jehettin meghlubiyetke uchrimaqta. Büyük iran xelqi yillardin béri bésim astida yashap keldi. Ular ashliq we erkinlikke mohtaj. Kishilik hoquq we iranning bayliqi bulang-talang qilinmaqta. Iranning özgirish waqti yétip keldi," dégen. Buningdin burun aq saray iran xelqining naraziliq namayishini qollaydighanliqini bildürgen. Aq sarayning bayanatchisi sara xakabi sandrés "Amérika iran xelqining tinch yollar bilen özini ipadilesh erkinlikini qollaydu. Iran xelqining awazini yetküzüshke heqqi bar," dégen idi.

28‏-Dékabir iranning meshhed shehiride mal bahasining örlep kétishige qarshi partlighan namayish nahayiti tézla iranning bashqa jaylirigha kéngiyip, memliket xaraktérlik naraziliq herikitige aylan'ghan. Iran prézidénti rohaniy yéngi yilning harpa kéchisi téléwiziye nutqi sözlep, "Iran xelqining iran hökümitige naraziliq bildürüsh we tenqid qilish hoquqi bar" liqini bildürgen bolsimu, lékin u herqandaq zorawanliqqa süküt qilmaydighanliqini tekitligen. Chet'el axbarat wasitilirining bildürüshiche, iran hökümiti puqralarning féysbuk, twittér, instigram qatarliq ijtima'iy taratqulargha kirishige cheklime qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.