Президент трампниң ким җуңун билән қәйәрдә көрүшидиғанлиқи бу һәптә елан қилиниду

Мухбиримиз әркин
2018-05-01
Share

Америка президенти трамп сәйшәнбә күни шималий корейә рәһбири ким җуңун билән қачан вә қәйәрдә көрүшидиғанлиқиниң мушу һәптиниң ахирлириғичә елан қилинидиғанлиқини билдүрди. Бирләшмә агентлиқиниң хәвәр қилишичә, президент трамп “мениңчә қәйәрдә учришидиғанлиқимиз мушу бир қанчә күн ичидә елан қилиниду” дегән.

Әгәр уларниң көрүшүши әмәлгә ашса, бу америка президенти билән шималий корейә рәһбириниң тунҗи қетим учришиши болуп қалиду. Президент трамп илгири ким җуңун билән 5‏-айниң ахирлирида яки 6‏-айниң башлирида учришиши мүмкинликини билдүргән. У дүшәнбә күни сингапор улар учришишни ойлишиватқан җайларниң бири икәнлики, бирақ өзиниң шималий корейә билән җәнубий корейә оттурисидики қоралсиз районда учришишни мувапиқ, дәп қарайдиғанлиқини илгири сүргән. Униң тәкитлишичә, учришишниң қоралсиз районда өткүзүлүши диққәт қозғайдикән. У, “әгәр сөһбәт утуқлуқ болса уни хатириләшкә әрзигүдәк иш болиду” дегән. 

Җәнубий корейә президенти мунҗеин билән шималий корейә рәһбири ким җуңун 27‏-апрел күни икки корейә оттурисидики қоралсиз районда учришип, корейә йерим арилини ядросизлаштурушни вә тинчлиқ келишими имзалайдиғанлиқини җакарлиған. Президент трамп икки корейә рәһбириниң учришишиға иҗабий баһа бәргән иди. Лекин, ақ сарайниң баянатчиси сара хакабе сандерс сәйшәнбә күни учришишниң вақти вә орниға даир ички музакириләрни ашкарилашни рәт қилип, “президент ейтқандәк учришидиған орун турақлишишқа аз қалди. Биз униң пат йеқинда елан қилинишини күтүватимиз” дегән. Бу арида хитай ташқи ишлар министири ваң йиниң бу һәптә ичидә шималий корейәни зиярәт қилидиғанлиқи елан қилинди. Чәтәл ахбарат васитилириниң илгири сүрүшичә, ваң йиниң шималий корейәни туюқсиз зиярәт қилиши хитайниң корейә тинчлиқ сөһбитиниң сиртида қелиштин әндишә қиливатқанлиқини көрситидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт