Президент трамп, уйғур мәҗбурий әмгәк мәсилисидә «ишниң һәқиқитигә қарап һәрикәт қоллинимиз» деди

Мухбиримиз әркин
2020-09-21
Елхәт
Пикир
Share
Принт

Америка президенти доналд трамп мәҗбурий әмгәк мәсилисигә қарита позитсийәсиниң қаттиқ икәнлики, уйғурларни мәҗбурий әмгәккә селиш мәсилисигә қарита ишниң һәқиқитигә қарап һәрикәт қоллинидиғанлиқини билдүргән.

Президент трамп бу сөзләрни 18-сентәбир йәни өткән җүмә күни ақсарайниң ахбарат йиғинида бир мухбирниң бу һәқтики соалиға җаваб бәргәндә қилған. Америка һөкүмити өткән һәптә уйғур аптоном районида қуллар әмгикини ишлитип ишләпчиқирилған йәнә бир түркүм мәһсулатларни чәклигәниди.

Ақсарайниң ахбарат йиғинида мухбир «сизниң һөкүмитиңиз хитай компартийәсиниң шинҗаңда қуллар әмгикини ишләткәнликини сәвәб қилип, шинҗаңниң пүтүнләй мәһсулатлирини чәклимигән болсиму, лекин бир қисим мәһсулатлирини чәклиди. Хитай компартийәсиниң баянатчиси, ‹шинҗаңда мәҗбурий әмгәк йоқ, бу пүтүнләй ялған' дәйду. Буниңға сизниң инкасиңиз немә? иккинчи, иттипақдашлар буниңға диққәт қилидиғанлиқи, америка билән бир сәптә туруп, хитай компартийәси зорлаватқан мәҗбурий әмгәккә қарши һәрикәт қоллинидиғанлиқини билдүрдиму?» дәп сориған.

Президент трамп: «биз бундақ әһвални көрүшни халимаймиз. Бизниң бу җәһәттики позитсийәмиз интайин қаттиқ. Биз кәлгүси 2-3 күн ичидә доклат тапшурувелип, бу мәсилиниң баш-ахириға қарита интайин тоғра мәлуматқа еришимиз. Андин униңға қарита һәрикәт қоллинимиз» дегән. Бу президент трампниң һазирға қәдәр уйғурлар һәққидики соалға 2-қетим җаваб беришидур. У илгири: «уйғур кишилик һоқуқ қанун лайиһәси» мақулланғанда бир қетим уйғурлар һәққидики соалға җаваб бәргәниди. Америка вәтән бихәтәрлик министирлиқиниң өткән һәптә билдүрүшичә, нөвәттә техиму кәң даирилик тәдбирләрниң қануни анализи елип берилмақтикән.

Пикирләр (0)
Share
Толуқ бәт