Amérika prézidénti tramptin Uyghurlar mesilisige köngül bölüsh telep qilindi

Muxbirimiz irade
2017-11-01
Élxet
Pikir
Share
Print

Amérika prézidénti donald tramptin xitaydiki ziyariti dawamida Uyghurlarning kishilik hoquq mesilisini sürüshte qilish telep qilindi.

Bügün, amérika diniy étiqad erkinliki komitétining mu'awin mudiri sandra jolléy xanim we mezkur komitét xadimi ténzin dorjéler "Diplomat" zhurnilida mexsus maqale élan qilip, prézidént trampni Uyghurlarning we tibetlerning dini erkinlik weziyitige köngül bölüshke chaqirdi.

"Prézidént tramp, xitaydiki dini erkinlikni qollang" témisida élan qilin'ghan sandira juli xanim bilen ténzin dorji teripidin ortaq yézilghan maqalide xitaydiki Uyghurlar we tibetlerning dini erkinlikining qattiq bésimgha uchrawatqanliqi, ularning milliy medeniyitining "Xitaylashturush" siyasitining tehditige uchrawatqanliqi bayan qilin'ghan.

Maqalide xitay hökümitining Uyghurlar we tibetlerge qaratqan bésim siyasitining ziyankeshlikige uchrighan sanaqsiz wijdan mehbuslirigha wekil süpitide ikki kishining weqesi alahide tilgha élin'ghan bolup, uning biri Uyghur mehbus gülmire imin, yene bir tibet penchen lamasi gédxun naymadin ibaret.

Gülmire imin 2009- yili ürümchi weqeside namayish teshkilleshke qatnashqan dégen seweb bilen ömürlük qamaq jazasigha höküm qilin'ghan. Maqalide "Gülmire iminning peqet bir namayish teshkilligenliki üchün bundaq éghir qismetke duch kélishi peqet ayrim bir shexsning ehwali emes, belki pütkül Uyghurlarning béshigha kéliwatqan simwolluq halet," déyilgen.

Maqalining axirida mundaq dep chaqiriq qilin'ghan: "Prézidént trampning xitaygha qilidighan ziyariti bashlinish aldida, biz tibet buddistliri, Uyghur musulmanliri we bashqa dini az sanliqlar uchrawatqan ziyankeshliklerni untup qalmasliqimiz kérek. Xitay hökümiti özidiki mol medeniy we dini bayliqlargha bésim qilish emes, eksiche ularni qoghdishi kérek hem shundaqla penchen lama we gülmire imin qatarliq barliq wijdan mehbuslirini derhal azad qilishi kérek."

Maqalide yene amérika hökümitini xitaydiki sani az az milletlerge bésim ishlitishke qatnashqan emeldarlarning amérikigha kirishini chekleydighan tedbirlerni élishqa chaqirghan.

Toluq bet