Donald trampning qesem bérish murasimigha shi jinpingni teklip qilishi diqqet qozghidi
2024.12.13
Amérikaning yéngi nöwetlik pirézidénti donald trampning 2025-yili yanwarda ötküzülidighan wezipe tapshuruwélish murasimigha xitay dölet re'isi shi jinpingni teklip qilghanliqi 12-dékabir küni donald trampning axbarat katipi teripidin delillen'gen idi.
Birleshme agéntliqining bu heqtiki xewiride déyilishiche, xitay rehbiri shi jinping donald trampning wezipe tapshuruwélish murasimigha qatnishishni “Bek xeterlik” dep qarishi we bu murasimgha qatnashmasliqi mumkin iken. Xitayning washin'gtondiki bash elchixanisi bu heqtiki so'allargha jawab bermigen.
Biraq mutexessisler “Shi jinpingning washin'gtonning 1-aydiki soghuqida talada ötküzülidighan murasimgha qatniship, xitaygha qarshi keskin meydani bilen tonulghan kabént ezaliri bilen pegahta olturushi we donald trampning saylamdiki ghelibe nutqini anglishi éhtimalliqtin tolimu yiraq ishlar” dep körsetken.
Uning üstige, bu murasimgha teywenlik méhmanlarning qatnishish éhtimalliqimu teywenni “Xitayning ayrilmas bir parchisi” deydighan xitay rehbiri üchün bir “Selbiy amil” hésablinidiken. Xewerde déyilishiche, teywenning amérikadiki yuqiri derijilik diplomati 2021-yili pirézidént jow baydinning qesem bérish murasimigha qatnashqan bolup, shi jinping teywen diplomatliri bilen bir qatarda olturushtek xewpke tewekkül qilmaydiken.
Pirézidént donald tramp wezipige olturushi bilenla xitaydin kélidighan mallargha qoyulidighan tamozhna béjini 60 pirsentke östüridighanliqini bildürgen idi. Uning üstige donald tramp öz kabéntigha xitaygha qattiq qolluq siyaset yürgüzüsh terepdarlirini tallighan bir peytte, xitay re'isini qesem bérish murasimigha teklip qilishi amérika axbaratlirida küchlük munazire qozghidi.
Birleshme agéntliqining xewiride körsitilishiche, donald tramp gerche shi jinpingni murasimgha teklip qilish arqiliq méhmandostluqini körsetken bolsimu, biraq bu ikki dölet arisidiki riqabetning asanliqche hel bolidighanliqidin dérek bermeydiken.